No.1120/2021-2022

Aizawl, 25th June, 2021 : Vawiin zing dar 9 khan Human Resources Development Board Vice-Chairman, Lengteng A/C bialtu MLA ni bawk chuan a bial chhunga mi NE Khawdungsei PHC-a hman tur, COVID-19 hri kaite phurhna tura a bik taka duan ambulance thar chu Mission Vengthlang, Aizawl-a a chenna in atangin a vai liam.

He ambulance thar hi Maruti company siam Eeco Van a ni a, COVID-19 hri kaite him taka Driver ten an phurh theihnan indaidanna tha taka siam a ni a, a hmingah Emergency Health Services tia vuahin, Pu L. Thangmawia hian COVID-19 dona atana MLA Fund atanga a leisak a ni.

Ambulance vailiamna ah hian Pu L.Thangmawia chuan thusawina hun tawite hmangin NE Khawdungsei chu Mizoram leh Manipur pawhtu kawng pawimawh tak National Highway No 102B in a paltlang bakah, NE Khawdungsei PHC chu Mizoram chhunga Manipur ramri hnaih ber damdawi in te zinga mi a ni, a ti a. Manipur leh Mizoram inrina Tuivaiah hian Police leh Health Department te inkhuarin ramri kana lo lut te reng reng hi sawrkar thu angin COVID-19 screening test tihsak thin an ni a, heng zingah hian COVID-19 positive te pawh an awm thin a ni, tih sawiin, hetih lai hian COVID-19 hri kaite phurhna tur motor hranpa a ruahman a awm loh bakah tuna NE Khawdungsei damdawi in motor kawl lai mek hi kum sawm chuanga upa ni tawhin duh angin a fit tawk tawh lo a ni, a ti a. Remchang hmasaah NE Khawdungsei PHC motor kawl lai mek pawh hi siam that (repair) a nih tur thu a sawi bawk.

Pu L. Thangmawia chuan Zoramin hun harsa a tawh mek laia Lengteng bial khaw hrang hrang te, bial chhunga COVID-19 luhna khuate tan leh Aizawl veng hrang hrang tana an luangchhuak thin chu fakawm a tih thu leh Lengteng bial nula leh tlangval Mizo nun zemawi “thian chhan thih ngam” rilru pu chunga COVID-19 dona atana in volunteer mi 10 lai an awm chu lawmawm a tih thu sawiin, midangte tana ral hmatawnga an inpekna hi kan hre reng tawh dawn a ni, a ti bawk.

Pu L. Thangmawia chuan COVID-19 dona kawnga ral hmatawnga rim taka thawktu zawng zawngte zahna chibai a buk thu sawiin, Manipur ramri Tuivai-a Police leh Health department mi leh sa, thosi leh khawlum kara duty te chhuanawm a tih thu a sawi a. Mizoram himna an kutah thui tak a innghah avangin inthlahdah lo turin a ngen a, ramria duty te hi an thla khat ration buhfai a tum sak tur thu a sawi nghal bawk a ni.

Rev Malsawmdawngliana, Asst. Professor, Missionary Training College-in hunserh hmanga Pathian hnena hlanna a neih zawhah NE Khawdungsei PHC ambulance thar hi vai liam a ni.