2009/2025-2026

Lunglei, 2025 Khuangchawi thla ni 22: Lunglei District Deputy Commissioner (Bawrhsap) Office bul tuma mipuite'n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, "I Kawtkaiah Sawrkar" (Prashasan Gaon Ki Ore) thawh hnihna chu vawiin khan ṭan niin, Haulawng leh a chhehvel khaw mipuite tan Hausiampa Hall, Haulawngah hun buatsaih a ni.

January ni 14, 2025 leh May ni 14, 2025 inkar chhung khan Lunglei District chhunga khaw paruk - Haulawng, Ralvawng, Bunghmun, Tlabung, Lungsen leh Bualte-ah te "I Kawtkaiah Sawrkar" thawh khatna kalpui niin, sawrkar department hrang hrangte'n mipui service an chhawp chhuah chu he'ng khua leh a chhehvela mi 5,082 te'n an chhawr ṭangkai a. Vawiin aṭang khan a thawh hnihna kalpui leh niin, kar leh chhung khian Lungsen, Bunghmun leh Tlabungah te kalpui chhunzawm a ni ang.

Vawiina Haulawnga hun buatsaihah hian Lunglei Sub-Deputy Commissioner Pi Lalnunchhani Hnamte chuan hawnna thu sawiin, "I Kawtkaiah Sawrkar" hma lakna chu mipuiin District hmunpui pan kher ngai lova awlsam zawka sawrkar office hrang hrang an dawr theihna remchang a nih angin chhawr ṭangkai tum ṭheuh turin mipuite a chah a. Haulawng VCP Pu Lalsangzuala Chhangte pawhin Lunglei Bawrhsap hma laknaa an khuaa office hrang hrangin an kal chilh chu lawmawm an tih thu a sawi.

Vawiina Haulawnga I Kawtkaiah Sawrkar hun buatsaihah hian office hrang hrang - DC, District Civil Supply Office, Social Welfare, Health & Family Welfare, AH & Veterinary, Horticulture, BDO Lunglei leh Mizoram Rural Bank (MRB) te'n stall hawngin, awlsam zawka mipuite dawr theih turin an inpho chhuak a. Aadhaar siam ṭhat/siam thar, member belh/paih & ration card leh Aadhaar thlun zawm, bank account hawn thar leh sawrkar scheme hrang hranga inziah luh leh mipuiin harsatna an thlenna hun te buatsaih a ni.