Vawiin khan Mizoram Information Service Association huaihawtin an Director Pu L.R. Sailo pension-a chhuak tur a office-ah an thlah.
 
 

MISA President Pu David L. Thanglianan inkhawm hi a kaihruai a. Vice President Pu R. Vanhnuaithangan hunserh a hmang. Joint Director Pu Jim K. Chozah chuan thlahna thu sawiin Pu L.R. Sailo in department a ho chhunga department in hmasawnna kawng hrang hranga a neih thu a tarlang a. Public Relation ah phei chuan India ram pum huap pawha mi hmingtha leh entawntlak a ni a ti a. Officer leh staff te harsatna hrethiam a mirethei harsate dinhmun a hriatthiam zia a sawi a. A hunchhunga department in thawhhona tha an neih thu uar takin a sawi.

He thlahna inkhawmah hian MISA, Officers and Staff, District hrang hrangten ngaihhruina thil pek an hlan a. Directorate officer leh staff te bakah secretariat leh district office lama officer leh staff te an kim hle a, an department atanga pension a chhuak tawhte pawhin thlahna hun hi an rawn hmang ve a ni.

Thlahna inkhawm neih zawh hian zanriah an kilho nghal a ni.

Pu L.R. Sailo hian 9.7.1973 khan I &PR Department-ah DIPRO hna a zawm a, ni 21.9.1981 ah Deputy Director a kai a, ni 22.11.1982 ah Joint Director kai leh in Director hna hi ni 9.6.1992 atang khan vawiin thlengin a chelh ta a ni. Director anih hun chhung hian Department chuan hmasawnna nasa tak a nei a. Thuthar thehdarhtu media leh sorkar inkarah te, sorkar laipui leh state sorkar-ah te thawhhona tha tak thlen tirtu zing ami a ni. A hnathawh that avang hian Public Relations Council of India chuan Brain Trust of India chawimawina 2006 khan a hlan a. Public Relations milar chhinchhiahna bik Public Relations Hall of Fame-ah 2007 khan a hming telh ve a ni nghe nghe.

Attachment

  • Loading attachment...