Inrinni kalta a HPC (D) nia hriatten MLA rual, Assembly Committee on Govt. Assurance te an lo lambun (ambush) tuma anmahni zuitu Pu J. Lalthutiama, AVPA, I & PR Department chu vawiin khan Director leh a staff ten I & PR Conference Hall-ah a thla hualin himdam taka a let leh avanga Pathian hnena lawmthu sawina hun an hmang.

Director Pu Jim K. Chozah chuan an thawhpui Pu J. Lalthutiama dam taka a lo haw chu an lawm hle laiin misual kuttuara thi te chu Department in an sun takzet a, hliamte pawh an tawrhpui takzet a ni, a ti a. Thihna kotlanga an dah lai leh hlauhawm atanga hmun him hruaithlengtu chu Pathian a ni, a ti.

Pi Lalnithangi, Joint Director chuan inkhawm hi kaihruaiin, Inrinni kalta a thil thleng kha Mizoram tana thil lungchhiatthlak tak a ni a. Silaia tawngpawng kah an nih hnua darkar khat chuang beih an ni kha thil rapthlak tak a ni a, nunna chante kan sun rualin dama lo hawte hi kan lawmpui takzet a ni, a ti.

Assembly Assurance Committee te hi an Chairman Pu R.L. Pianmawia, Dy. Chief Whip hova Health Department hnuaia hmalakna hrang hrangte endika zin an ni a. 27^th March, 2015 khan Aizawl atanga chhuakin Darlawn, Lungsum, Damdiai leh N. Khawdungsei te an tlawh hnuin Sakawrdai ah an riak a. A ni hnihna programme an hman dawn mek laiin he vanduaina hi an tawk ta a ni.