Vawiin khan Novelty Art Gallery, Chaltlang-ah Pu V.Laltlanmawia ‘1st Solo Painting Exhibition’ chu I&PR Director Pi Lalnithangi-in a hawng a; he exhibition hi sorkarin artist-te tana financial assistance hmanga a nodal department Information & Public Relations Department leh Mizoram Art Development Society (MADS) tangkawpa buatsaih sak a ni.

Painting Exhibition hawnna inkhawm Pu Rosiamliana Ralte kaihhruaiah Khuallian Pi Lalnithangi chuan Information & Public Relations Department leh artist-te chu thui taka inzawm tlat an ni a, he department-a hotu hluiten art an chawisang a, art hmasawnna tura theihtawp chhuah thin an nih avangin vawiin thlengin he department-a officer leh hnathawkte  thinlungah art hmangaihna a inphum tlat a ni, a ti. I&PR Department chu sorkarin visual arts - lemziak leh film siam - te tan nodal department-ah a ruat hnuah mIzoram puma artists te leh film lama inhmangte chu hungkhatah dahkhawmin hmalak zel a ni a; tunah chuan lemziak leh film siam lam tan pawl nghet tak sin sak ve ve an ni tawh a, an thawhho zelnaah inpawh tak leh induhsak tawnna nen hmalak zel theih a nih hi entawntlak tak a ni, a ti bawk. Artist-te chu mi bik an nih avangin an tuina leh eizawnna lamah an chhungte hriatthiamna leh dawhtheihna an mamawh hle a, vawiina Mizo artist hlawhtlinna hmu mekte chu an chhungten an thlawp tha a nih tih a hriat a, an chhungte chungah I&PR Director a nihna angin lawmthu a sawi a. I&PR Department hmachhawp zingah multi-facility centre ‘Lianchhiari Run’ sak zawh a nih hunah artist-ten engtiklai pawha an kutchhuak mawi tak tak an phochhuah theihna tur art gallery bakah film chhuahna tur hmun theatre changtlug dah ruahman tum a nih thu a sawi bawk.

Mizo artist senior leh vawiina solo exhibition neitu V.Laltlanmawia chherchhuaktu Pu Biaklara  pawhin thu sawiin Mizo artist-te intelkhawmna pawl hmasa ber ‘Mizo Painters Association’ chu ama hovin kum 1974 khan din a nih thu leh Mizoram-ah art exhibition hmasa ber chu kum 1977 khan chumi hun laia Mizoram Lt. Governor Pu S.K.Chhiber, Chief Secretary Pu S.K.Nath leh Aizawl DC Pu Clement Ilango leh an nupuite hmalaknain Aijal Club-ah buatsaih a nih thu a tarlang a. Tun hma khan artist leh painter te chu thlanlung, signboard leh number plate ziaktu angah ngaih an ni chauh thin a, chu chu ei an hmuhna ber pawh a ni a, amaherawhchu art ngaisangtu leh artist te hmakhua ngaitu I&PR Director hlui Pu R.L.Thanzawna (L) hmalakna nasa tak avangin Mizo artist-te chu chawikan zel an ni a, tun thleng hian I&PR Department chu artist-te tan an damkhawchhuahna ber a ni ta a ni, a ti.

Vawiina Solo Exhibition hmasa ber neitu Pu V. Laltlanmawia hi a naupanlai atanga Pu Biaklara hnuaia zir a nih bakah Mizoram Institute of Fine Arts hnuaia ‘5 Years Vocational Training Course in Drawing & Painting’ a tih zawh hnuah kum 2000 khan Rashtrya Lalit Kala Kendra, Kolkata-ah ‘Sculpture’ a zir leh a. Award hrang hrang a dawn tawh bakah art workshop-ah te Resource Person-ah a tang tawh thinin Mizoram pawna Painting Exhibition 9 laia a kutchhuakte a phochhuak tawh bawk a ni. A kutchhuak mipuite hmuh theia larzualte chu - Vanapa Hall platform background te, Aizawl Ramhlun ‘N’ VC Auditorium platform background te, State Guest House-a Mizo Village lemziak te leh Mizoram State Museum platform background te a ni a. Tuna a Solo Exhibition-ah hian a painting 37 lai phochhuah a ni a, vawiin October ni 3 atanga October ni 7 thleng, chawhma dar 10:00 atanga tlai dar 6:00 thleng a duh apiang tan Novelty Art Gallery, Chaltlang-ah a tlawh theih a ni.