Indian Council of Agricultural Research (ICAR) bultumin vawiin khan Agriculture Minister Pu H. Liansailova hovin Agriculture leh a kaihhnawih Department te an inhmukhawm.
Pu H. Liansailova chuan Agriculture leh a kaihhnawih Department hrang hrang – Horticulture, AH & Vety., Soil & Water Conservation, Sericulture, Fisheries, Environment & Forest Department kaltlanga Mizoramin hma a lak mek dan leh helama harsatna hrang hrang a tawh te ICAR hotute nena sawihona hun remchang tak buatsaih a ni chu lawmawm a ti a. Plan 12-na lo awm turah hian Mizoram-a kuthnathawktute hamthatna leh hmasawnna tur bakah an harsatna sutkianna tur ruahmanna tha tak neihpui turin ICAR hotute a ngen nghal bawk. Minister chuan India hmarchhak State-te chu ei leh barah an intodelh loh avangin theihtawp chhuaha hmalak mek a ni a ti a, Agriculture bikah phei chuan khawl tha chakna te, thiamna thar zawk hmang leh van ruahtui hmang tangkaia hlawk lehzuala buh leh bal thar tum a nih thu a sawi lang bawk.
Dr. A.K. Singh, Deputy Director General, ICAR, New Delhi pawhin ICAR chuan Plan 12-na lo awm turah hian State hrang hrang te harsatna a theih ang anga lo enpui an tum thu tarlangin vawiina an sawihona eng atanga hmalak a nih tur thu a sawi bawk.
He Meeting-ah hian Dr. S.V. Ngachan, Director, ICAR, Reasearch Complex, Barapani te, Dr. K.A. Pathak, Joint Dorector, ICAR, Mizoram Centre, Kolasib te, Mizoram Agriculture leh a kaihhnawih Department hotuten sawihona hun hmangin Department hrang hrang hmasawnna tur chu ICAR te nena Research hmanga duan chhuah zel ni se, ICAR, Mizoram Centre, Kolasib pawh tangkai lehzuala hman ni se an ti.
