1253/2026-2027

Kolasib, 1st July, 2026: Vawiin khan ICAR RC for NEH Region, Mizoram Centre, Kolasib chuan leitha hman thiam chungchang inzirtirna, sawrkar laipui programme "Khet Bachao Abhiyan" campaign kharna hun chu an Office Conference Hall-ah an hmang. He hun hi Kolasib Bawrhsap Pu H. Dolianbuaia chuan khuallian (Chief Guest) niin a hmanpui a. Sawrkar mi pawimawhte, NABARD, Block Agriculture Officer, District Horticulture Officer leh Kolasib District chhunga kuthnathawktu tam tak an tel a ni.

Dr. S. Doley, HoRC, ICAR Mizoram Centre chuan kalkhawmte lawmna hun hmangin, "Khet Bachao Abhiyan" campaign hi June ni 1 atanga ni 30, 2026 chhung khan neih a nih thu a sawi a. He campaign chhung hian Kolasib District chhunga khua leh veng hrang hrangah leitha hman thiam chungchang inzirtirna ngawrh taka kalpui a nih thu a tarlang. He leitha hman thiam campaign hian kuthnathawktute tan hamthatna nasa tak a thlen a beisei thu sawiin, loneitu tam tak hnenah zirtirna pek an nih thu a sawi bawk.

Khuallian, Kolasib Bawrhsap Pu H. Dolianbuaia chuan loneitu chhungkua atanga seilian a nih thu sawiin, he "Khet Bachao Abhiyan" campaign ICAR Mizoram Centre, Kolasib in ngawrh taka an kalpui thei chu lawmawm a tih thu a sawi a, kuthnathawktuten an tangkaipui turzia a tarlang a ni. Leitha (chemical fertilizer) hman thiam lohin leilung hriselna a tihchhiat theih dan leh thlai thar thlenga a nghawng dan a sawi a. Chuvangin, kuthnathawktute chu rim taka thawk tur leh mithiamte rawna thlai enkawl dan tha hmang tangkai zel turin a fuih a ni.

He hunah hian Pu JD Traite, DDM, NABARD pawhin leitha hman thiam a pawimawhzia tarlan pahin bank lamin loan pekna scheme hrang hrang an neihte leh PM Kisan kaltlanga hmalak theih dan te a sawi a. Dr. Lianthanzaua, Block Agriculture Officer chuan fertilizer hman nasat lutukin leilung thatna a tihchhiat theih dan sawiin, ran ek leitha hman, thlai chi hrang hrang chin kual (crop rotation) leh thlai chin dan tha ten lei chhia a ven theih thu leh thar chhuah a tih hlawk zawk thu a sawi bawk. Hemi rual hian State Department in he campaign-a hma an laknate tarlangin, leitha hman thiam zir chunga hma la chhunzawm zel turin loneitute a chah a ni.

Pu Lalnunpuia, District Horticulture Officer pawhin hlo tur (Glyphosate) hman nasat lutukin leilung leh mihring hriselna thlenga a tihchhiat theih dan a sawifiah a, leitha hi hman loh tawp tur tih lam aiin, a hman dan tur dik leh hman hun hrethiam chunga thlai leh ram leilung enkawl a pawimawh thu a sawi.

Dr. Blessa Sailo, Sr. Scientist, ICAR Mizoram Centre hnen atanga lawmthu sawina (vote of thanks) ngaihthlak a nih hnuin campaign kharna hun hi tihtawp a ni. Vawiin hunah hian kuthnathawktu leh department mithiam mi 104 lai an kalkhawm a, loneitute hnenah hian Soil Health Card leh chemkawi sem niin, kuthnathawktute tan Field Day buatsaih nghal a ni bawk.