Vawiin khan Icfai University chuan PWD ten a an University JnNURM kawng (ICFAI Road) an siarn zawh lawmthu sawina thingpui an buatsaih a. He hun hi Pu Lal Thanzara Parliamentary Secretary, i/c PWD, PWD hotute, Durtlang North Local Council leh mi pawimawh dang te bakah University a thawk te nen an hmang tlang.

Pu Lal Thanzara chuan thu sawiin kan hna kan tih avanga, kan beisei hauh loh, hetianga Icfai University-in kawng thar lawmna an siam hi kan lawm hle a. University dintute leh a thawkte chungah pawh lawmthu ka sawi a. Mizote hian thiante zir ang zir ve mai kan ching a, hei vang hian lehkhawthiam hna nei lo (unemployed) kan tarn phah a ni. Zirlaiten hna an hmuh ngei theihna tur an zir a hun tawh hle a. Hemi atana Icfai University-in course hrang hrang a kalpui hi Mizoram tan a hlu takzet a, zirlaite an vannei hle a ni tiin a sawi. A zir chhuak ten hna an hmu thei zel te hi a lawmawm hle a ni tiin, he University mamawh ang te sorkar atanga tih theihte tihsak zel pawh a duh thu a sawi bawk. Hetianga an kawng thar an lawm thiam em avangin Bus Parking pawh PWD chuan blacktop sak dawn a, tin, a thenawm Hindi College kawng pawh blacktop sak a nih tur thu a sawi bawk. Tuiluankawr pawh tha taka siam turn niin, JnNRUM scheme atanga tihturin an khung mek tih a sawi bawk.

Pu P. Rohmingthanga, Pro-Vice-Chancellor chuan Icfai University chu Mizoram taria zirna pawimawh tak a nih thu leh Mizoram-a private sector investment lian ber a nih thu a sawi a. Kan sorkarin a ngaipawimawh thin chu lawmawm a tih thu sawiin, kawng tha tak an siam sak avangin sorkar chungah lawmthu a sawi bawk. Mizoram a Insitution zingah Approach Road nei tha ber an nih a rin thu a sawi a. Kan zirlai te hian course tluangtlam (conventional courses) mai um lova, Icfai-a job oriented course ang te hi zir uar deuh deuh se a duh thu a sawi.

Pu Lalrochuanga Pachuau, Icfai University Board of Management Member pawhin kawng tha an neih chu a lawmpui rualin he University hi Mizo naupangte tana zirna hmun pawimawh ber pakhat a ni, tiin a sawi a. Institution tha tak a nih chhoh a beisei thu sawiin, zirtirtute pawh tan la leh zuala zirlai chak lo zawk te dawmkang tur zawnga nasa zawka tan la zel turin a fuih nghal bawk. University hotute pawhin thawktu tha tak tak te ngheh leh zualna tur pawh an ngaihtuah a tul hle niin a sawi bawk.

Pu Saithankhuma, Durtlang North Local Council Chairman veng neitu an nihnaah an intih neitu thu sawiin, Joint Committee-in kawng hmingah pawh Icfai Kawng tia an vuah tak thu a sawi a. Hetianga kawng tha tak an veng tan pawha chhawrnahawm tak a awm theih avang hian Icfai University leh PWD chungah lawmthu a sawi a ni.Dr. H. Dengkimi, Principal - Mizoram Hindi Training College pawhin Icfai awm avanga kawng thar tha tak siam a nih avangin Icfai University leh PWD chungah lawmthu a sawi bawk.

He hunah hian PWD Chief Engineer, Pu Vanlaltluanga leh a thawhpuite bakah, Icfai hotute leh Durtlang North Local Council te leh mi pawimawh dang te an tel a ni.