Vawiin chawhma dar 10.00 atang khan ni khat awh turin Integrated Child Protection Scheme (ICPS) hnuaia hnathawk tura lak tharte pualin an hnathawh dan tur kalhmang inkawhhmuhna Orientation Programme buatsaih a ni a; he hun hi Social Welfare Minister Pu P.C. Lalthanliana chuan a hmanpui a ni. He programme hi State Child Protection Society huaihawt a ni.

Pu P.C. Lalthanliana chuan Social Welfare Department-in hmuh theiha hmasawnna a nei chu lawmawm a tih thu a sawi a. “Integrated Child Protection Scheme hi Mizoram-in kan khawtlang nun tluchhe mek tundinna atan kan mamawh hle a; chuvang chuan he scheme hnuaia hnathawk tura lak tharte pawhin inpumkhatna hnuaiah rinawm leh taima taka kan thawh a tul a. Kan thawhrimna rah chu tun atanga kum 10-20 hnuah Mizoram khawtlang nunah hian a rawn lang chhuak ngei dawn a ni” Pu P.C. Lalthanliana chuan a ti. Social Welfare Department-in naupangte enkawlna kawnga nasa taka tan a lakna chuan thingtlang kilkhawr ber thlenga rah tha a chhuah thu sawiin, “Naupangte an tet-te atanga chaw tha leh zirtirna tha kan pek avangin an hriselna chungchangah pawh nasa takin hma an sawn a; thingtlang kilkhawrah pawh naupang pian leh than tha tak tak an pung zel a ni” a ti. ICPS hnuaia hnathawk tura lak tharte chu an hna tuichilh tura fuihin, “Mahni hna tuipuite hi mi awhawm an ni a; chutiang mi chu Mizoram leh mipuiten kan mamawh a ni. Sawrkar hnuaia hna kan thawh hian mipuite tana biak harsa nih mai kan ching thin hi sim a hun a; kan hnathawh dan hi miten min tehna a ni a, keimahni tan darthlalang a ni bawk a ni” Pu P.C. Lalthanliana chuan a ti.

ICPS hnuaiah hian mi za chuang hnathawk tura lak thar an ni a; vawiina Orientation Programme-ah hian district 8 (pariat) atangin mi 92 an tel a ni. Programme hi Pu P.L. Liandinga, Programme Officer-in a kaihruai a; chawhnu lamah naupangte hamthatna tur scheme leh dan hrang hrang hman mekte chipchiar taka inhrilhhriatna hun hman a ni.