Vawiin chawhnu khan Secretariat Conference Hall-ah ICT Minister Pu Robert Romawia Royte kaihhruaina hnuaiah ICT hotute, Director NE-LSA, Mizoram, Department of Telecom, Govt. of India, Telecom & Infrastructure Provider Association of India (TAIPA), AMC leh Mizoram chhunga mobile service provider leh infrastructure provider ten thutkhawmna an nei.

Minister Pu Robert Romawia Royte chuan mipuiten inbiakpawhna kawnga harsatna hrang hrang an neihte sutkian dan uluk takin kan ngaihtuah ho a ngai a ni, a ti a. Tun aia hmasawnna kan neih ngei theih nan thawhhona a pawimawh a ni, tiin kalkhawmte chu a fuih a ni.

Meeting-ah hian service provider hrang hrang ten Mizoram chhunga hna an thawhdan leh an hmachhawpte an tarlang a. District tina optical fiber network thlundan tur te, mobile service chak zawk neih theih nana hmalakna te, call drops tam lutuk te, thingtlang khaw tam taka mobile phone hman theih loh te, broadband service awm that loh chhan te sawi ho a ni a. Aizawl chhunga mobile signal that tawk lohna chhan chu mobile tower dah belhna tur hmun a awm loh thin vang a ni tih tarlan niin he harsatna sutkian dan tur te, district hrang hrang a bik takin Siaha leh Lawngtlai district a internet tihchak te, thingtlang hmun kilkhawr tak taka khawl bun harsatna te sawi ho a ni.

Tun dinhmunah khaw 704 zingah khaw 314 chu inbiakpawhna (mobile service) that lohna a ni a, Airtel Service Provider chuan mobile service that lohna khaw 252 ah mobile tower 227 dah turin hma an lak mek  a. National Highway-ah zin mite tana signal that theihna turin mobile tower 19 dah tum a ni a. ICT Department chuan telecom policy changtlung zawk ruahmanin kalpui thuai turin hma an la mek bawk a ni.