No.477/2021-2022

Aizawl the 11th may, 2021 : Vawiin khan Information & Communication Technology (ICT) Department Minister Pu Robert Romawia Royte hovin Mizoram chhunga inbiakpawhna (mobile phone) leh Internet Service tha zawk neih theih dan tur Video Conference (VC) kaltlangin sawiho a ni.

Pu Robert Romawia Royte chuan tunlai khawvelah IT leh telecommunication tel lo chuan ni khat pawh kan awm thei tawh lo a, sawrkar department hrang hrangten internet leh telecommunication chak tha zawk kan mamawh, a ti a. COVID-19 hrileng avangin mipui tam tak kan inkhung mek a, zirlai ten online class an neih reng bakah online exam hrang hrang atan internet connectivity siam that vat a tul bawk a, tun hrileng avang hian hun dang zawng aiin Mizoram chuan internet service chak leh tha zawk kan mamawh a ni, a ti. ICT Minister chuan Union Communication and IT Minister Shri Ravi Shankar Prasad hnenah Mizoram telecommunication system tichangtlung tura ngenna DO letter a ziah thu a sawi bawk.

Minister chuan Mizorama Mobile phone leh Internet pe chhuak tu (Service Provider)-te chu tang leh zual turin a beisei thu sawiin an harsatna tawh mek te chu bawhzui sak a inhuam thu a sawi a. Mobile phone leh internet service lama thawkte chu COVID-19 inkhuahkhirhna pawhin an hnathawh pangngai a tikhailak lova, Mizoram khaw hrang hrang te hnenah ngenna siamin heng mite hnathawh tibahlah lova tawiawm zel turka a sawm a ni. Harsatna tawk an awm chuan ICT Department-ah thlen zel turin a ngen bawk.

Mizoramin Internet connection kan lakna pui ber PGCIL chuan tunah hian Mizoram pum pui tan 200 Gbps a chak bandwidth a pe mek a, online class leh tul dangah uar taka internet hman a nih tak hnu hian 100% hman zawh vek thin a ni a, chuvangin internet hmangtuten harsatna an tawh phah fo thin. He harsatna ching fel tur hian PGCIL hian 100 Gbps bandwidth bun belh leh turin hma an la mek a. Hei hi thla hnih/khat hnuah chuan bun zawh theih beisei a ni.

Vawiin Video Conference-ah hian ICT Department Secretary Pu Lalramsanga Sailo, Aizawl D.C. Dr Lalhriatzuali, DDG Dept of Telecommunications Pu Sri Krishna leh ICT Deptt. officials te bakah BSNL, Airtel, JIO, Vodafone hotute, infrastructure provider PGCIL, Indus, Bharti te leh Local Internet service pe chhuak tu te an tel a ni.