Vawiin khan Information and Communication Technology (ICT) Minister Pu Zodintluanga hovin a pisa-ah ICT Department hnathawh thlirletna hun hman a ni a. ICT Secretary leh officerte an tel a ni.

He hunah hian network project bika ICT Department hmalakna te, Mizoram district hrang hrang dinhmun te sawiho a ni a. ICT hian network project hrang hrang neiin central project pathum an neia: Universal Service Obligation Fund (USOF) hnuaia district leh block headquarters thlunzawmna tur, Bharat Net - block level leh khaw dang thlunzawmna tur te a ni a, hengah hian optical fibre hmang tura ruahman a ni. Sawrkar laipuia Department of Telecommunications chuan Airtel kaltlangin tower 246 sa turin ruahmanna a siam tawh a, hemi atan hian hna thawh mek a ni a, tower sakna tur hmun 133 enfel tawh a ni. Bharat Net leh USOF atan hian block 13-ah hna thawh tan tawh a ni bawk. Hei hian thingtlang khaw tam taka inbiakpawhna tha zawk bakah internet chak zawk a thlen beisei a ni. State Project-ah hian NEDP hnuaiah Aizawl leh district capital hrang hrang bakah district headquarters chhunga office inthlunzawmna leh inbiakpawhna changtlung tak (wireless) project kalpui a ni a. NEDP hnuaia project hi Mizoram State e-Governance Society (MSeGS) ten an kengkawh a ni. NEC hnuaiah district capital ( Aizawl tel lovin) office hrang hrang internet connection pekna tur hna kalpui mek a ni a, Mamit, Kolasib leh Serchhip-ah hemi atan hian khawl bun a ni tawh a. District dangah pawh chhunzawm zel tum a ni.