Vawiin chawhma dar 11 khan Planning Conference Hall-ah Information and Communication Technology (ICT) Minister Pu Zodintluanga chuan e-Bharat Project a hawng a. e- Bharat hi Information and Communication Technology (ICT) Department hmalakna niin Mizoram State e-Governance Society (MSeGS) ten an kengkawh a. e-Bharat Project hi awlsam zawka mipuiin sawrkar an dawr theihna tura ruahmanna a ni.

ICT Minister Pu Zodintluanga chuan mihring khawsak phunga danglamna thlentu lian ber pakhat chu Information Technology (IT) hi a ni, tiin IT lama hmasawnna a taka kan tawng chho hi thil  lawmawm tak a ni, a ti a. ICT hmalakna hnuaia State Data Center (SDC), State Wide Area Network (SWAN) , e-district leh Common Service Centre (CSC) te chu mipuiin an hmang tangkai hle a ni tiin Mizoram hmun hrang hrang atangin e-Bharat hmang hian form thehluh leh bill pek te mahni in ngei atangin a tih theih tawh dawn a ni, a ti a. e-Bharat hi sawrkar langtlang ni tura hmalakna pakhat a ni tiin hmasawnna tam tak a keng tel a ni, a ti a. Minister chuan e-Bharat hman a nih hnu chuan mipuiin sawrkar office ah kal ngai lovin online hmangin  an mamawhte an tifel thei tawh ang a, office hnathawk te pawhin nasa lehzuala hnathawhna hun an nei thei dawn a ni, a ti a. IT hmanga service hlawhtling tur chuan connectivity a that a ngaih thu sawiin theih tawpin hma lak a nih thu a sawi a. Department hrang hrang atanga lo kal te hnenah chuan e-Bharat hnuaia an service-te vil tha turin a fuih a, e-Bharat in a ken tel service te mipui ten an hman tangkai theih zel turin service tam zawk ngaihtuah belh turin a chah bawk a. Ruahmanna thar mipuiin an hlawkpui theih tur leh sawrkar pawhin a chhawr ngei theih turah chuan ICT Department-te an in hawng reng a ni, a ti a. Mipui te tana tangkai thei tur service an pek zel theih nan kalkhawm te chu duhsakna a hlan nghal bawk a ni.     

e-Bharat Project in a tum ber chu awlsam leh senso tlem zawka mipui ten sawrkar an dawr theihna tur Online leh Mobile Service hmanga siam sak a ni a. e-Governance hnuaia ban pawimawh tak pakhat G2C  (Government to Citizen) tihhlawhtlinna tura hmalakna a ni. Project hnuaiah hian mipui tana tangkai tur Online Service 34 leh Mobile Service 18 awmin, mipui tana Information Technology (IT) kaltlanga service pek tur hi 52 lai a awm a. Project website chu eBharat.mizoram.gov.in niin January Ni 24, 2018 atangin hman theih tura kalpui a ni a. Google Play Store-ah e-Bharat app hi a download theih dawn bawk a ni.

e-Bharat atana State Project Committee chu February Ni 14, 2014 khan neih a lo ni tawh a. e-Bharat hnuaiah hian Department hrang hrang awmin chungte chu – Animal Husbandry & Veterinary, Health & Family Welfare (H&FW), Public Health Engineering (PHE), Disaster Management & Rehabilitation, Horticulture, Social Welfare, Rural Development, Tourism, Trade & Commerce, Industries, Transport, Higher & Technical Education, ICT, Agriculture, Sainik Welfare & Resettlement, Labour & Employment, Co-operative, Taxation, Mizoram Public Service Commission leh S.C.E.R.T te an ni. Mobile leh online service thenkhat te chu PHE Department hnuaia tui connection thar neihna leh tui bill pekna leh pek hun tur hriattirna te, S.C.E.R.T hnuaiah admission tih hun tur, result leh syllabus enna tur te, Disaster Management & Rehabilitation hnuaiah chhiatrupna thlen huna awm dan tur mipuiin an hriat theihna tur te, MPSC hnuaia exam neihna turah online hmanga form thehluh te, Health & Family Welfare-ah district hrang hrang a mobile medical unit ten an report rang taka an thawn zung zung theihna te, Tourism Department hnuaiah Tourist Lodge-a thleng tur ten awlsam taka room an hauh lawk theihna tur te an ni.

Programme-ah hian ICT Commissioner leh Secretary Pu Vanlalchhuanga, IAAS chuan kalkhawmte lawmna thu a sawi a. Technical Report ICT Informatics Officer, Pu Vanlalringa atangin ngaihthlak a ni a. Lawmthu sawina in ICT CIO, Dr. Lalthlamuana chuan programme hi a khar a. He hunah hian e-Bharat a tel department hrang hrang te an tel kim hle a ni.