528/2022-2023
Aizawl, 18th May, 2022 : Nizan khan Hyve City Hall ah Mizoram IT Society (MITS) pawl tlangzarhna hun hman a ni a, Pu Robert Romawia Royte, ICT Minister chu Khuallian niin Pu L.Thangmawia, MLA, HRD Board Vice Chairman chu Khualzahawm a ni.

He hun hmanpuitu Pu Robert Romawia Royte chuan MITS pawl lo ding thar chu lawmawm a tih chu sawiin Department of Information Technology tana thawhpui tha tak tur niin an Branch pakhat ang maia a ngaih thu leh pawl tangkai tak tak a nih ngei a rin thu a sawi a. Corruption do nan langtlang sawrkar a pawimawh a, chu chu IT hmanga tihpuitlin theih a ni a ti.

Khualzahawm Pu L. Thangmawia pawhin thu sawiin MITS pawl chu an lo din tirh atangin HRD Board te nen thawh hona neiin Covid-19 Lockdown hun chhung zawnga zirtirtute tan Online-Training an lo neih pui thin tawh thu a sawi a. Pawl tangkai a nih zui nan duhsakna a hlan a ni.

Dr.Lalthlamuana, Chief Informatics Office, ICT Department-in Mizoram ICT dinhmun leh a hmathlir te Powerpoint Presentation hmangin a sawi bawk.

Dr. R.Chawngsangpuii, Treasurer in kalkhawmte lawmna thu a sawi a. Pu C.Lalrinawma, General Secretary-in MITS lo indin chhoh dan leh a hmalak tawh dan report a pe a. MITS hi Ni 22.6.2021 khan Mizorama IT hmasawn zel nan mi thahnemngai ten an din niin Mizoram Societies Registration Act 2005 hnuaia Registration nei a nih thu sawi a. School zirtirtute tan Online Training an neihpui thin thu te, IT lam eizawnna leh zirna lam thupuiah hmangin Webinar an buatsaih thin thu te, Mizoram Sawrkar-a Education kaihhnawih Department hrang hrangte IT hmanga zirna tihhmasawn nana thawhhona thuthlung an ziah tawh thute a sawi a ni.

MITS President, Dr C.Lalnuntluanga chuan an pawl dinchhan sawiin Mizorama IT lama eizawna leh zirna chawisan te, sawrkar hmalakna tawiawm te, IT lama thawktute leh zirlai te inpumkhatna tura thawh leh a tul anga IT kaihhnawih thil pawimawh hrang hrangte mipui hriata puan chhuah thin te chu an tum a nih thu a sawi a. Ram leh hnam hmasawn nana thawktu pawl hrang hrangte nen thawh ho theih an beisei thu leh an inhawn thu a sawi a ni.

He hunah hian an sawm angin ICT Department, Science & Technology Department, DDK Aizawl hotute bakah tlawmngai pawl hrang hrang – Science Teacher Association of Mizoram (STAM), Mizoram Academy of Science (MAS), Mizoram Mathematics Society(MMS) leh Mizo Academy of Letters (MAL) aiawh te leh IT lama tuimi te an tel a ni.

MITS member ni duh te tan Online Member Registration tihna an tlangzath nghal bawk a. Member pangngai tan Rs. 200/-, Life Member- Rs. 1,000/- leh Patron Member – Rs 3,000/- a ni a, an pawl website www.mits.org.in ah inziah luh theih a ni.

Attachment

  • Loading attachment...