DIRECTORATE OF INFORMATION & PUBLIC RELATIONS, Government of Mizoram, India

1961/2022-2023

Aizawl, 17th September, 2022 : New Delhi-a cham mek ICT Minister Pu Robert Romawia Royte chuan nimin khan IT leh E-Governance lama hmasawnna liantham thlentir thei tur Digital Mizoram Project Cheng nuai 4,000/- (Rs 40 crores) man chu MEITY Ministry-ah Officials liante a sawipui a. Mizoram chu hmun fianrial, kawng leh thlawhna hmanga inpawhna that tawk lohna hmun a nih avangin India ram hmun dang aia digital connectivity mamawh nasa bik kan ni tiin Cheng nuai 4,000 senna tur project chu sanction ran a nih theih nana Finance Ministry-ah recommendation pe rang turin a ngen a. NeGD President & Addl Secretary Abhisek Singh chuan Mizoram project chu tha thawkhat nia sawiin sanction vat a nih theih nan an tih tur an tih zawh vat tur thu ICT Minister hi a lo hrilh a ni.

Sports Minister Pu Robert Romawia Royte chuan Ministry hrang hrangah PMJVK chungchang a sawipui a, Mizoram district 3 chauh tuam thin PMJVK scheme chuan amah ngei pawhin a lo rawt fo tawh angin Guideline thar anga kumin atanga Mizoram district 11 a tuam kim tur chu lawmawm a tih thu a hrilh a, Instalment thenkhat release tura Mizoram sorkar rawtna pawh thehlutin hun reilote chhunga Cheng nuai 10200 (Rs 102 crs) chu release an tum thu an lo hrilh a. Sum hman chak dan azirin a dang pawh an release zel tur thu an lo hrilh a ni.

Sports Minister Pu Robert Romawia Royte chuan REC Chairman & CMD Vivek Kumar Singh, IAS pawh kawmin Motorsports Racing Tract atana Cheng nuai 700 lai an CSR Fund atanga Mizoram an pek avanga lawmthu hrilhin chak taka hnathawh mek dan a hrilh a. CSR atanga sanction tura Tourist Bus 3 leh Tourist Car 1 an dil pawh tifel vat turin a ngen a, REC Chairman chuan tihfel vat a lo tum tur thu Tourism Minister hi a lo hrilh a ni.

Vawiin vek hian Tourism Minister Pu Robert Romawia Royte chuan Ministry of Tourism-a Senior Officers te meeting neihpuiin Mizoram tana PRASAD Projects sanction vat dan turte, Ministry of Tourism(MoT) in Swadesh Darshan sum a pekchhuah ran dan turte, Mizorama Golf Tournament siam dan turte leh Mizorama Tourism Khawmpui lian International Tourism Mart(ITM) hlawhtling taka neih dan turte sawiho a ni a. Union Tourism Secretary Arvind Singh, IAS chuan Tourism Minister Pu Robert Romawia rawtnate chu tihhlawhtlin an tum tur thu a sawi a ni.

Mizoram Tourism Minister ngennain vawiin hian Union Tourism Minister chuan Mini PRASAD Scheme atangin projects 3 a approved a,sum release nghal tur a ni.

Tourism Minister Pu Robert Romawia Royte hi ni 3 awh Dharamshala, Himachal Pradesh-a Tourism Ministers Conference-ah a tel zui dawn a ni.

Attachment