Vawiin khan International Fund for Agricultural Development (IFAD) Project Design Team Member pathum, Kolasib District huamchhunga tlangram kuthnathawka eizawng te dinhmun zirchhiang tur te leh Zanlawn khawtlang hruaitu te chuan Puna Hall, Zanlawn ah inkawm hona hun an nei.
He inkawm hona hun ah hian Zanlawn khawtlang hruaitu te chuan an ei leh bar zawn dan tlangpui te, an loneih dan leh huan siam dan te chipchiar takin an sawifiah a. An harsatna leh mamawh te IFAD team member te an hrilh a ni. Heng bakah hian IFAD team member te hnena atanga zawhna an dawn te an chhang nghal bawk a ni.
IFAD hi kum 1977 khan din niin, United Nations Organisation (UNO) hnuaia Agency pakhat niin, khawvel ram thangmeka thingtlang hnathawk te dinhmun chawikan leh retheihna umbona atana hna thawktu a ni.
IFAD Team Mizoram rawn tlawhtu te hi team pali (A,B,C,D) ah an inthena, Kolasib, Mamit, Serchhip leh Champhai District a thingtlang kuthnathawktu te dinhmun leh eizawnna an zirchiang dawn a ni. Kolasib District bik zirchiang tur team member te hi pathum niin, Dr.Virendra Pal Singh, Agronomist & Agro Forestry, Pi Barbara Jordan Vincente, Economist leh Pu Pratul Dube, Financial Management Specialist te an ni.
He inkawm hona hun ah hian Pu R. Lalnunzira, District Agriculture Officer (DAO), Kolasib, Dr. V. Zodinsanga, Deputy Project Director (ATMA), Kolasib leh Pu Liankunga, Additional District Horticulture Officer, Kolasib te pawh an tel a ni.
IFAD team member te hian Zanlawna hun an hman zawh hnu hian Kolasib an pan leh a, chawhnu lamah Kolasib D.C kaihhruaina in official te, kuthnathawktu te leh pawl hrang hrang hruaitu te nen meeting an nei leh dawn a ni. Naktuk lamah Oil Palm Mill, Bukvannei leh Bairabi te an tlawh leh anga, April ni 9 (Pathianni) hian Aizawl lam panin an lo let leh dawn a ni.
