Indian Institute of Management (IIM), Ahmedabad a zirlai ten Chief Minister Pu Lal Thanhawla chu vawiin khan a Office Chamber-ah an hmu. IIM zirlai te hi Prof. Anil Gupta in a rawn ho a ni.

Chief Minister Pu Lal Thanhawla chuan zirlaite chu lo lawmin chibai a buk kim vek a. Mizorama an lokal chu lawmawm a tihthu a sawi rualin, Mizote khawsakzia leh rambuai kan nih atanga kan than chhoh dan te a hrilh a ni. IIM zirlai te hi Mizoramah ni 4 chhung an cham tawh thu sawiin, Champhai, Ngur, Vapar leh Murlen te ke hlira an fan thu Chief Minister chu an hrilh a. Mizoram an lokal chhan sawiin, an zirna tizautu atan leh eco tourism lama hmalak theihna  awmte an rawn thlithlai pah thute an sawi a. Mizoram chu ramngaw hringdup hmun ala ni chu an thinlung khawih hmasa ber tu anih thu foreigner zirlai thenkhatte chuan an sawi a. Khaw hrang hranga a mi chengte chu a khawsak hmangah te kan chenna boruak tichhelo zawnga khawsa an hmu te chu hlimawm an tih thu sawiin, hetiang eco friendly nunzia an hmu chu an beisei piahlam anih thute an sawi bawk a ni.

IIM zirlai te hi an vaiin 25 an ni a. An zingah hian ramdang mi, USA, France, Germany, Norway, leh Nepal atangte in 9 an tel a ni. Naktuk hian Aizawl an chhuahsan leh ang.