Indian Institute of Mass Communication (IIMC) chuan nimin khan New Delhi ah kum 50 a tlin, Golden Jubilee lawmna ni pahfawmin Convocation vawi 47-na an hmang.

Convocation hi Pu Prakash Javadekar, Union Minister for Information & Broadcasting chuan hmanpuiin, IIMC chu Communication University ah hlankai a nih tur thu a puang a. He hmalakna hi Prime Ministerin ‘Participative Communication’- communication hnuaia journalist te thuam chak tumna atan a ni a ti a. Hemi atan hian I & B Ministry chuan a road map siam thuai a tum a ni a ti.Rawtna siam duh tan I & B Ministry website ah siam theih a nih tur thu a sawi bawk a. Minister hian IIMC logo thar leh website, saptawng leh hindi tawnga hman kawp theih a hawng nghal bawk a ni.

Convocation ah hian IIMC Centre paruk - New Delhi leh Dhenkanal bakah centre hawn thar Aizawl, Amravati, Jammu leh Kottayam atangte a zirchhuak mi 341 hnenah Diploma Certificate hlan an ni a. Zirlaite hi PG Diploma hrang hrang Journalism English leh Hindi, Advertising & Public Relations, Oriya leh Urdu Journalism te a zirchhuak an ni a. Course hrang hranga zirchhuak 31 te hnenah Special Awards hlan a ni bawk.

He hunah hian Pu Sunit Tandon, Director General, IIMC, New Delhi, Prof.KM Srivastava, New Delhi leh IIMC, Aizawl Centre mentor ni bawk te bakah Pu L.R.Sailo, Special Officer, IIMC, Aizawl Centre te an tel a ni.

IIMC, Aizawl Centre hi kum 2011 khan din tanin, tunah hian Mizoram University, Tanhril-ah a awm mek a, an pual hian University Campus ah hian hmun pek an ni tawh nghe nghe a, building sa turin tunah hian tender koh mek a ni. Zirtirna pe hian mithiam tak tak leh Professor senior New Delhi leh India hmun dang atangte in an lokal reng reng a.Aizawl centre hi IIMC, New Delhi a professor senior ber, Prof. K.M. Srivastava in mentor niin a rawn vil reng a. Academics lam enkawl tur hian assistant professor pahnih an awm mek bawk a. Kum thum chhunga zirchhuakte hi media organisation lian tak tak, PTI, UNI, DDK (New Delhi leh Aizawl) ah te an thawk mek a ni. Tunah hian English Journalismah 1-year diploma course a pe mek a, seat hi All India Entrance Exam paltangte hnenah pek thin a ni a, seat awm thei zat hi 15 a ni rih a ni. Aizawl hi exam centre pakhat a ni bawk. IIMC hian journalism course TV, Print leh News media te bakah media leh mass communication zirna, trainingna leh research tihna lama a tha bera ngaih a ni.

Attachment

  • Loading attachment...