Zirtawpni ni 25 March 2011 tlai khan Indian Institute of Mass Communication (IIMC), New Delhi a Director General Sunil Tandon chuan Mizorama IIMC din tur chungchangah Chief Minister Pu Lal Thanhawla chu a chenna bungalow ah a hmu.

Chief Minister Pu Lal Thanhawla hmalakna leh ngenna angin Union Minister for Information & Broadcasting Pi Ambika Soni chuan Mizorama IIMC din alo phal tawh tihpuitlinna turin tunlai hian New Delhia thuneitu ten chinchang an rawn thlithlai reng a. Chak zawka kalpui anih theih nan Pu Hawla chuan IIMC DG hi a chahchhuak a. Mizorama bul tanna turin mamawh tam tak, office turte, class neihna tur, examna tur leh thil dang tam tak lo ruahmana, tul dang tur reng renga hma lo la turin Pu L.R.Sailo, MIS (Rtd), Press Secretary to CM nilai chu contract basis in IIMC, New Delhi chuan 'Special Officer' atan a rawn ruat tawh bawk a ni.

Inkawmnaah hian Sunil Tandon chuan Mizorama IIMC din tur chungchangah Chief Minister chu inhawng taka alo dawnsawn avangin lawmthu a sawi a. Sunil-a chuan kumin July - August thla atang khian course khat tal bul tan tum anih thu chief Minister chu hrilhin, May ni 24 khian All India Entrance Test neih tura Examination Centre 8 zingah Aizawl pawh a tel dawn a ni a ti a. Heng atana tul tur innghahna in an mamawh dawn a ni a ti bawk a. IIMC Campus atan hian alo berah ram Acres 10 aia te lo mamawh anih tur thu sawiin, Sunil-a chuan hemi atan hian hmun hual ruk a neih thu a sawi bawk a ni. Chief Minister chuan thalaite hmakhua hriain, IIMC din chu a hma thei ang bera kan neih theih nan sorkar chuan theihpatawp a chhuah reng a ni a ti.

Sunil Tandon hian Chief Secretary Pu Vanhela Pachuau pawh a office ah a hmu tawh bawk a ni.

IIMC course tanna turah hian Mizoram University Campus chhungah innghah a ni dawn a, hemi chungchangah pawh hian University thuneitu te nen an inbepawp reng a ni.