2761/2024-2025

2024 Khuangchawi thla ni 29: October ni 25, 2024 khan Lunglei District Bawrhsap Pu R. Lalṭhazuala chuan a hnuaia mi ang hian Inner Line Permit (ILP) dil chungchanga mipuite hriat tur hriattirna a chhuah.

"Mizoram Sawrkar Home Department lehkha No.F.22018/1/2020-HM(ILP)/Pt Dt 17.10.2024 thuchhuakin a tar lan angin Inner Line Permit (ILP) dilna chu ni 01.11.2024 aṭangin online-a kalpui tawh tur a ni a. ILP thla 6 dam emaw, kum 2 dam emaw dil thar tur leh renewal tur chuan online portal ilp.mizoram.gov.in kal tlangin dilna theh luh vek tawh tur a ni. Tin, ni 01.11.2024 hma lama ILP lo pek chhuah tawhte chu a dam hun chhung (validity) tar lan ang a la dam ang.

"Online-a ILP dil dawna hriat tur pawimawihte:

"1. Dilna hi sponsor-tu chauhin mobile phone emaw, computer hmangin ilp.mizoram.gov.in -a in-register hnuah a theh lut tur a ni.

"2. Offline hmanga Temporary ILP pek chhuahte'n online portal kal tlanga regular ILP an dil dawnin Temporary ILP copy an upload ngei ngei tur a ni.

"Online portal hmanga Temporary ILP pek tawhte tan erawh chuan Temporary ILP number chhut luhin an dilna hmasa a lo lang ang a, siam ṭhat leh tihdanglam ngai a awm a nih chuan siam ṭhain, theh luh leh mai tur a ni.

"3. Dilna theh luh rual hian document pawimawhte portal-ah upload tel nghal tur a ni.

"4. ILP dilna chu approve a nih hnuah a diltu phone-ah SMS hmangin approve a ni tih thuziak leh reference number a lo thleng ang.

"5. SMS-a reference number lo thleng hmang hian portal-ah ILP Fee leh Security Deposit pek kawp nghal tur a ni a. Fee pek zawhah ILP hi download theih a ni tawh ang.

"6. ILP neitu chuan eng tik lai pawhin soft copy-in a phone-ah emaw, physical copy (print)-in ILP a kawl reng tur a ni.

"Hemi chungchanga harsatna neite chuan Judicial Branch (Room No-22), DC Office, Lungleiah office hun chhungin zawh fiah theih reng a ni e."