Vawiin chawhma khan Health Directorate Conference Hall, Dinthar ah ni 2 awh tur Intersified Malaria Control Programme(IMCP) II hnuai a hnathawh leh hmalak mek te thlirletna neih a ni a, he hun ah hian District hrang hrang a Chief Medical Officer te, CMAI atangte leh State Vector Born Diseases Control Programme hnuai a thawktu hrang hrang te an tel kim hle. Review Meeting hawnna programme hi Director of Health Services, Dr.Rohmingthanga Ralte in kaihruaiin Dr.K.Ropari, Principal Director, Health & Family Welfare cum Mission Director, National Health Mission in khuallian niin a telpui bawk.

Dr.K.Ropari, chuan thusawiin Hriselna hi mi zawng zawngin kan dikna chanvo a ni a, hemi tihlawhtling tura kan awm hi kan vannei hle a ni tih kan hriat a, kan hma a thawh tur awm apiang ah theihtawp kan chhuah tur a ni a ti. Tunhma chuan Malaria hi Mizoram a natna thihpui tam ber a ni thin, tun ah erawh chuan nasa takin malaria avanga thihna hi a hniam tawh a, hemi thlen theihna chhan pawh thawhona tha tak thawktute ah a awm vang a ni ati. Hriselna lama hma kan sawn zel theih nan Mizoram hi Aizawl chauh a ni lo a ni tih hria a, thawktu hrang hrang te khawihmun ah pawh awm thei turin kan inpeih reng tur a ni a ti. Malaria avanga thihna alo tlem zawk nan kan khua alo sik ser ser anih chuan veng tinah ASHA a awm a, Thisen test leh damdawi a thlawnin a tih tir thei a,pan nachang kan hriat a pawimawh thu sawiin natna tam tak hi invenna awm reng kan hman thiam phawt chuan mipuite pawh hian nasa takin min pui thei a ni a ti. Chief Medical Officer tinte anmahni bial chhung theuh a, Review meeting hlawk tak leh tangkai taka hmang thin turin a chah bawk.

Dr.Rohmingthanga Ralte, Director of Health Services pawhin thusawiin thawktute pawh infuih tawn reng a, zawldawhna nen thawhhona tha siam a pawimawh a, khawi hmunah pawh kan thawhhona a that a, thawhona a that phawt chuan nasa takin hma kan sawn dawn a ni a ti. Hnathawktu hrang hrangte, mipui zirtir leh hrilh hriatna kawngah pawh tan kan lak a tul tih sawiin Health Services Director chuan "Faina hian Malaria avanga thihna a ti tlem" tih a sawi bawk.

Dr. C.Zarzoliana, State Programme Officer, Vector Born Diseases Control Programme chuan Malaria vei, kum 2017 ah chuan mi sangkhat (1000) zel ah mi pakhat(1) anih theih nan inbuatsaihna kalpui mek a nih thu a sawi a, Malaria vei ni a rinhlelh reng reng chu enkawlna pek thuai tur a ni ati. Malaria hrik enna Rapid Diagnostic Kit(RDK) vengtinah ASHA hnenah a thlawn a tih theih a nih thu leh damdawi pawh a thlawna lak theih a awm thu sawiin hengte hi tangkai taka mipui ten chhawr nachang kan hriat a pawimawh a tul hle a ni a ti.Malaria avanga thi hi kum 2013 khan mi 21 anni a, tun kum kal mek July 2014 thleng hian mi 13 zet Malaria avanga thi an awm tawh a ni a ti bawk. Malaria avanga thi tam ber te hi inentir tlai vang anih thin fo avangin, a hma thei ang bera inentir tur a ni.

Dr.Zorammuana, Consultant, M&E in lawmthusawina hun a hmang a, chawhnu lamah District hrang hrang atanga an hmalakna te presentation neih a ni.