Central Sorkar Media Unit hrang hrang leh State Sorkar Dept. thenkhatte intelkhawmna Inter-Media Publicity Co-Ordination Committee (IMPCC) chu vawiin khan Forest Dept. Conference Hall-ah an thukhawm.

Vawiin meeting ah hian Dept. hrang hrang - All India Radio, Doordarshan, Press Information Bureau (PIB), Directorate of Field Publicity, Directorate of Advertising & Visual Publicity, Army Recruiting Office, Mizoram Khadi & Village Industries Board, Agriculture, Soil & Water Conservation, Health, Social Welfare, A.H.& Vety leh Forest Dept. te an tel a, March thla IMPCC thupui “Ramkang ven leh ramngaw humhalh” tih hmanga an Department theuh hmalak dan an sawiho a, March ni 6 - 8 chhunga Aizawl District khaw 3 - Ratu, Lungsum leh Sailutar a Bharat Nirman/Flagship Programme Public Information Campaign hlawhtling taka neih zawh tak chungchang an sawiho bawk a. Vawiin meeting-ah hian tunlaia Aizawl leh a chhehvela vawk hri leng chungchang tarlan a ni a, vawk hri darh zau zel tur ven nan vawk sa ei loh a that zawk thu tarlan a ni bawk.

Vawiin meeting hi an chairman, Doordarshan News leh PIB hotu ni bawk Pu Mangjangam Touthang-in a kaihruai a, thla thar April thla thupui atan “Hriseln ngaih pawimawh (Giving health top priority)” tih an thlang a, IMPCC hi April ni 26 ah PIB Media Centre ah an thukhawm leh dawn a ni.