Central Sorkar Media Unit hrang hrang leh State Sorkar Department thenkhat intelkhawmna, Inter Media Publicity Co-ordination Committee (IMPCC) chu vawiin khan Press Information Bureau (PIB) Media Centre, Aizawl-ah an thukhawm.

Vawiin meeting-ah hian Department hrang hrang - All India Radio, Aizawl leh Lunglei; Doordarshan; Press Information Bureau (PIB); Directorate of Field Publicity (DFP); Agriculture; Soil & Water Conservation; Industries; Environment & Forest leh AH & Vety Department te an tel a. January thla IMPCC thupui “Kum thar thalaite tan” tih hmanga an Department hmalakna theuh an sawiho a, February ni 6 - 8 chhunga Champhai District khaw 3 - Khawbung, Zawlsei leh Dungtlang-a Sorkar laipui Bharat Nirman Flagship Programme Public Information Campaign neih tur leh February 21 - 23 chhunga Lunglei District khaw 3 - Buarpui, New Khawlek leh Dengsur-a neih tur an sawiho a, New Land Use Policy (NLUP) hmalakna avanga mi hlawhtlingte chanchin Media hmanga tarlan chhunzawm zel ni se tih an sawiho bakah NLUP Mizorama kalpui anih atanga bawnghnute tam zawk tharchhuah chungchang pawh sawilan a ni bawk.

Vawiin meeting hi an Chairman, PIB leh Doordarshan News hotu, Pu Mangjangam Touthang-in a kaihruai a, February thla IMPCC thupui atan “Kangmei laka inven (Fire Prevention)” tih an thlang a, IMPCC hi February ni 26-ah Forest Department Conference Hall-ah an thukhawm leh dawn a ni.