Central Media leh a kaihhnawih State sorkar Department  te inthlunkhawmna, Inter Media Publicity Coordination Committee (IMPCC) chu vawiin khan Pu Pu C. Lalrosanga, Addl. D.G., N.E. hovin All India Radio Conference Hall, Aizawl-ah an thukhawm. Meeting-ah hian thla hmasa meeting neiha October thla atana thupui thlan ‘Vote neite chanvo leh mawhphurna’ tih chungchanga DDK, Aizawl, leh RNU, AIR hmalakna te ngaihthlak a ni a. Assembly Election tinzawn a programme hrang hrang AIR leh DDK in an buatsaih leh an tichhuah tur te chu he meeting-ah hian puanzar a ni bawk.

Pu C. Lalrosanga chuan Election Commission of India (ECI) in recognized political party te tan tun Assembly inthlan lo awm turah Radio leh TV-ah te thusawina hun a rawn ruahman thu sawiin hemi atan hian AIR leh DDK ah te minute 810 ve ve hun pek an ni dawn a ti. ECI-in inthlan hmasa lama party te dinhmun bukin AIR leh DDK ah te hun an chan rei zawng a rawn ruahman a, chumi ang chuan Congress in minute 219; MNF in minute 182; MPC leh ZNP ten minute 91 ve ve; BJP in minute 40 leh CPI, CPI(M), NCP leh BSP te tan minute 45 theuh AIR leh DDK ah te hun an chang dawn a ni. Political party te thusawi tur script chu Vetting Committee in a endik a ngai dawn a, hemi hnua ciah chhuah thin a ni ang. Hengte hi AIR chuan November ni 8 atangin leh DDK chuan November ni 10 atang tein an tichhuak dawn a ni.

RNU, DDK, Aizawl  chuan November ni 12 atangin nitin Election Bulletin zan dar 7:30 leh dar 8:00 inkarah an tichhuak dawn a, hemi bakah hian DD News, New Delhi pawhin Assembly inthlan lo awm tura atan Janwani programme tih chu November ni 16 ah an tichhuak bawk dawn. RNU, AIR, Aizawl pawhin inthlan chungchang leh a puanzarna programme engemaw zat an buatsaih dawn bawk a ni.

Vawiin meeting-ah hian, department hrang hrang, PIB, Field Publicity, Directorate of Health Services, Agriculture, Soil & Water Conservation, AH & Vety, I&PR, Asst. CEO, AIR leh DDK Aizawl aiawh te an tel a ni.