Thingtlanga chhungkaw harsa, inchung rangva nei zo lo te tan Rural Housing Project hnuaiah nimin khan Thingsulthliah RD Block huamchhunga chhungkaw 100 te hnenah a thlawnin Home Minister Pu R. Lalzirliana chuan inchung tur rangva bundle 4 theuh a sem. SDO (Civil) Office Complex, Saitual leh Thingsulthliah BDO Complex a rangva semna hun buatsaih ah hian Home Minister chuan Tlangnuam leh Thingsul a chhungkaw 40 leh Saitual chhehvela khaw 8 atanga chhungkaw 60 thlanchhuah te hnenah rangva hi sem a ni.

Rangva semna programme SDO(C) Office Complex Saitual leh BDO Office, Thingsulthliah a buatsaih ah te Home Minister Pu R. Lalzirliana chuan hetianga, mirethei inchung rangva nei zo lo te tan a thlawnna rangva pek hi hun hmasa lam kum engemaw zat kalta khan Chief Minister Pu Lal Thanhawla kaihhruai sawrkar chuan a bul lo tan tawhin miharsa leh chanhai tam tak te tan malsawmna a lo nih tawh thu a sawi a. Tun sawrkar-a he programme chhunzawm leh a ni chu lawmawm leh ropui a tih thu sawiin mirethei leh pa chhe zawkte tanpui chu Pathian duhzawng a ni a, inchung rangva nei zo lo ten rangva an dawng hi ka lawmpui a ni, a ti bawk.

Home Minister chuan mihringte rualkhai lo taka awm hi hmasawnna a ni lo a, in khai rual taka mite an awm theih nan sawrkar chuan hmasawnna programme hrang hrang duangin a kalpui meka, mahse hmasawnna hi vawi leh khata thil tih theih a ni lo a tiin hei hian mi zawng zawng duhkhawpa tuam hlawm tur chuan hun a duh rei tur thu a sawi. Rangva dawng chhungkuate chu a hmanna tur dik taka hmang ngei tura chahin Pu R. Lalzirliana chuan he huna mipui kalkhawmte chu rinawm leh taima taka an mahni hmazawn theuha NLUP a ni emaw, hamthatna dangte a ni emaw dik taka a nihna ang ngeia hmang turin a fuih. Thil reng reng a nihna ang tak an hman leh an kalpui chuan an hlawhtlin ngei theih thusawiin chumi rah chuan an nunah zahawmna a keng thei dawn a ni, a ti bawk.

Saitual a he programme-a hmanpui hma hian chawhnu khan Seling Branch YMA in YMA Day vawi 78-na puala Blood Donation Camp, YMA Library-ah an buatsaih chu a tlawh a. Hetah hian Pu R. Lalzirliana chuan YMA member ten mi mangang leh a mamawh te tana thisen an pek hi mite nunna petu a ni a, thian chan thih ngam, lanna hun dik tak a ni tiin mite tana an inpekna chu ropui a tih thu a sawi. Mizoram mai nilo India ram khawpui hmun hrang hrangah te pawh he rilru hi a lang chhuak fo thin a, Mizo damlo mangang te tan an mamawh hunah heng hmuna awm Mizo zirlai pawl leh association ten thisen an pe thin hi an fakawm a, pipu ten min rochun, tlawmngaihna heng hmun hlaah te pawh an kengkawh hi an chhuanawm hle a ni a ti. Thisen lak hna hi Synod Hospital Durtlang, Blood Bank chuan a hmuna kalin an tul zawng zawng an buaipui a, YMA member thahnem takin thisen an pe a ni.