August ni 15, (Thawhleh Ni)a India Independence Day vawi 71-na chu India ram dangte rualin Mizoramah urhsun taka hman a ni dawn a. Aizawl-ah chuan AR Sipai Lammual ah zing dar 9:00AM atangin Independence Day lawmna hi tan a ni ang a. Mizoram Chief Minister Pu Lal Thanhawla’n Hnam Puanzar pawt pharhin thu a sawi ang a. Independence Day Parade bakah National leh State Award te sem a ni ang. Hemi ni hian sawm bikte pualin Raj Bhavan-ah Governor’s “At Home” thingpui ruai buatsaih a ni bawk.
District hrang hrangah pawh Independence Day lawmna hi neih a ni dawn a. Heng ah te hian Speaker, Minister leh Parliamentary Secretary te bakah mipui aiawha thlan ram hruaitu dang ten an hman pui dawn a. Speaker Pu Hiphei chuan Tlabung-a Independence Day lawmna hi a hmanpui dawn a. District khawpui hrang hrang a Independence Day lawmna turah te chuan Lunglei-ah School Education Minister Pu H.Rohluna; Siaha-ah Finance Minister Pu Lalsawta; Champhai-ah Horticulture Minister Pu P.C.Lalthanliana; Serchhip-ah UD&PA Minister Pu Zodintluanga; Kolasib-ah Health Minister Pu Lal Thanzara; Lawngtlai-ah Parliamentary Secretary Pu T.T.Zothansanga leh Mamit-ah FCS&CA Minister Pu John Rotluangliana ten an hmanpui dawn a ni.
Independence Day vawi 71-na lawm nan zing atangin sokar building ah te chuan India Hnam Puanzar zar chhuah a ni ang a. Kohhran hrang hrang te leh sakhaw hrang hrang te chu India ram leh ram hruaitu te tana tawngtai turin ngen an ni.
