1586/2024-2025

14th August, 2024: India ram Independence Day vawi 78-na lawmna atan leh ruihhlo dona atana Ruihhlo Do Kawngzawhpui – WALKATHON – Walk Against Drugs chu 14th August, 2024 (Nilaini) zingkarah Excise & Narcotics Department chuan a huaihawt. He kawngzawha thupui chu – Together we can create a safer, healthier and drug-free community (Kan tanho phawt chuan khawtlang him zawk, hrisel zawk leh ruihhlo laka fihlim kan din thei ang) tih a ni.

He Ruihhlo Do Kawngzawhpuia khuallian, Pu Lalnghinglova Hmar, Excise & Narcotics Department minister chuan kalkhawmte hnenah thusawiin, “India ram zalenna sualtute khan thil tam tak chanin a thente phei chuan an nunna hial an chan a. Khang pasalthate khan beidawng duh lovin India ram zalenna an sual a, a tawpah chuan India ramin zalenna a lo nei ta a ni. Chutiang bawkin Mizoramah sawrkar, khawtlang, tlawmngai pawl leh kohhranin ruihhlo kan do va, a rah chu kan hmu nghal mai lo a ni thei; mahse beidawng hauh lova kan do zel chuan Mizoram hi ruihhlo lakah kan la zalen ngei ang tih beisei chungin ruihhlo hi I do zel ang u. Zirlai zingah kan thiante ruihhlo laka fihlim lo an awm a nih pawhin keini tal chu fihlim turin tan i la zel ang,” a ti.

He Kawngzawhpui kharna inkhawma thusawitu, Pu Lalramsanga Sailo, I.R.S, Secretary to Govt. of Mizoram pawhin “He Kawngzawhnaa lokalte chuan in thiante zingah ruihtheihthil laka fihlim tura bul tantu nih tum theuh tur leh ‘War against drugs – Ambassador’ in ni tih inhre nawn leh turin ka chah duh bawk che u a ni,” tiin kalkhawmte a chah a ni.

He Ruihhlo Do Kawngzawhpui hi Pu Z. Lalhmangaiha, Commissioner of Excise & Narcotics chuan a kaihruai a. Pu Peter Zohmingthanga, Joint Commissioner of Excise & Narcotics chuan kalkhawmte ruihhlo laka fihlim tur leh ruihhlo dona kawnga an mawhphurhna hlen tura intiamna a kaihruai.

He kawngzawhpuiah hian School hrang hrang atangin zirlai 250 chuang an tel a. Central YMA OB leh Central YMA Kumpuan Committee te bakah Department thawktute leh ruihhlo dona kawnga mi thahnemngaite an vaiin mi 400 dawnin kawng hi an zawh a ni.