Ramchhung  leh Mizoram hmun dangte rualin Sub-Divional Hqrs. Thenzawl-ah Independence Day 2011 chu tluang taka hman ve a ni a. Parliamentary Secretary Pu K.S. Thanga’n parade contingent ralthuam keng 1 leh school naupang 12 te hnam puanzar chibai buk a chhang let a, kalkhawm mipui thahnem tak hmaah zalenna ni thuchah a sawi.

Pu K.S. Thanga chuan Mizoramin remna ni Silver Jubilee a lawm thei ta leh remna leh muanna chu hmasawnna hnukpui ber anih thu te a sawi a, Pu Lal Thanhawla kaihhruai sorkar-in Mizoram hmasawnna tura hmachhawp a neih lian ber NLUP hmang tangkai a, dik tak leh rinawm taka hmala turin mipuite a fuih a. Hun hmasa atang tawhin congress ministry chuan Small Hydel project 14 lai a siam tawh thu leh hengte hi kum upat leh a enkawlna lama harsatna hrang hrang avanga hluihlawn nual anih tawh thute sawiin tunah hian Hydel project lian tham zawk thahnem tak siam turin sorkar-in chak takin hma a la a ni, a ti.

Parliamentary Secretary chuan ei leh bara intodelh nan Agriculture hmalakna a tarlang a. Tunah hian Power Tiller 100 chuang hmangin mihring tha 86000 hu an tlin tawh thu te, tunhmaa state sum in a zir loh avanga hman tangkai ve theih loh RKVY chu tunah hian sum ngaihtuah belha ramchhung state dangte zulzuia hman tangkai ve tawh a ni tiin kumin hi buh thar tam kumah hial puan a ni ta a,  loneitu leh kut hnathawktu mipui mimir kan thawhho thiam erawh a pawimawh hle ang a ti. Pu KS Thanga chuan Thenzawl bial chhunga sorkar hmalakna hrang hrang te, hmachhawp thahnem tak kalpui mekte sawiin Thenzawl chu Mizoram laili kiltin atanga khaw pawimawh tak ala nih dawn avangin hmathlir thui tak neia an hmunhma te humhalh tlat turin mipuite a ngen a ni.

Thenzawl Independence Day lawmna ah hian Mizo inbuan category 3 ah inelna buatsaih niin lawmman hi khuallian hian a sem a, sorkar hnathawk, tlawmngai pawl, zirlai leh mipui mimir an tel tha hle a ni.