Vawiin India Independence Day vawi 73-na ah hian kan zalenna champha lawm tura helai hmuna lo kalkhawmte leh Mizoram mipui zawng zawngte chibai bukin duhsakna ka hlan a che u .

India ram zalenna kha kum tam tak sual niin mi tam takin an nunna hlu tak an hlan a, an that lai hunte hlanin tanin ah an vanglai hun te an hmang ral bawk a, keini thang leh tharte hian   zalenna sualtute inpekna leh an tawrhna te kan zah thiam a pawimawh a, an inpumpekna leh mahni hmasial lova an inhlan avangin kan zalen a, hmalam hun thlamuang takin kan suangtuah thei a ni tih i in hre reng ang u. Vawiin hun pawimawh takah hian mizo pasaltha India zalenna sualtu thla hmasa mai a chatuan ram min pan san ta Pu Darthawma, Lunglei khua chu zahna chibai ka buk a, India zalenna sual hun lai khan Indian National Army ah a tel a, a tumruhna leh a huaisenna te a fakawm em emin keini thangtharte hian Pu Darthawma ang mi huaisen leh tumruh hi entawn nachang kan hriat a pawimawh hle a ni. Ka thinlung takin zahna ka hlan a, India ram zalenna atana a inpekna hi Mizoram hian a theihnghilh tawh ngai lovang.

Mizoram mipuiten sawrkar tharah rinna in nghah ngam avangin vawiin hun hi remchanga la in lawmthu sawi ka duh a. Thla riat chauh a upa he sawrkar hian hmasawnna hna tam tak a thawk hman a, kan khawtlang leh ramchhunga thu inchuh leh inhnialna tam tak a chingfel hman bawk a ni. Ram leh hnam hmangaihna thinlung nen hmasawnna hna tam zawk chak takin kan thawk dawn a ni tih leh heng hmasawnna hna thawh dal tu reng reng chu kan sutlang zel dawn a ni tih vawiinah hian ka sawi duh a ni.

1.         Sawrkar Flagship programme ‘Socio-Economic Development Policy’ (SEDP) tih hlawhtlin hi kan thupui ber leh kan intiamna a ni. SEDP chu hmasawnna huapzo leh ngelnghet, a chhunga mipuite dinhmun tihmasawn tur leh ei leh bar kawnga kan intodelhna tur, khawtlang nun tihmasawn tu leh mipuite hlimna leh thlamuanna thlentu tur a ni. SEDP chuan Gross State Domestic Product (GSDP) sang zawk a thlen dawn a, mipuite sum dehchhuah tihpun a tum bakah eizawnna kawng a hawn belhin hmasawnna ngelnghet leh tluantling a thlen dawn a ni. Hei bakah hian hmasawnna ruhrel din hi a tum pawimawh ber pakhat a ni bawk a. SEDP hlawhtling taka kalpui a nih theih nan Minister-te enkawlna hnuaiah Board hrang hrang 14 din a ni a. Heng Board hrang hrangte hian chanpual insemin chak takin hma an la dawn a ni.

Raw chin leh a tihpuitlin hi kan sawrkar flagship programme SEDP hnuaia programme pawimawh ber pakhat a ni a. Heta tan hian raw chi hnih Brandisii leh Latifloras te chu chin a tih pun theihin a awm tawh a. Heng raw lian pui pui pahnih teh kuala inches 15-20 inkar leh feet 50 chuanga sangte hi tunah tissue culture in a chi siam a kui tiah mek an ni. Heng hi Mizoram chhunga chin remchanna hmun apiangah a tam thei ang bera sawrkarin chin a, siam chhuah (process) a tum a, chuta tan chuan Bamboo link road te, a chin pun na leh a chi man tur te nen kan sawrkar hian Central Sawrkar atangin pawisa a tam thei ang ber lakchhuah a tum a. A tul ang zelin state budget SEDP atang pawhin remruatna siam a ni bawk ang.

2.         Ramchhung inrelbawlna a awlsam zawk nan leh mipuite tan awlsam zawkna a nih theih nan District pathum - Saitual District, Khawzawl District leh Hnahthial District siam thar a ni a, District tharte hlawhtling taka kalpui a nih theihna atana sum sen tur pawh sawrkarin a ruahman fel sa vek tawh a, District ramri leh District thara tel tur khua te pawh siamfel vek tawh a ni. Deputy Commissioner Office leh Superintendent of Police Office din turin engkim peihfel a ni tawh a, sawrkar Department hrang hrangte pawh District thara an inbun felna tur ruahmanna siam tura hriattir an ni tawh bawk.

3.         Dan leh thupek kenkawh hi khawtlang ralmuanna leh hmasawnna atana pawimawh tak a nih avangin sawrkar pawhin a ngaipawimawh em em a, hemi kawnga hmala tu ber police te tha tihchak hi a pawimawhzia hria in kawng hrang hrangin hma lak a ni a. Kan Police Department te remhriatna leh thawhrimna zarah kum kalta engemaw chen kha chu dan leh thupek bawhchhiatna lian tham a thleng lo a, hei  hi thil chhinchhiahtlak tak a ni. Police Department inpekna leh ruahmanna felfai tak avangin nikum kumtawpa State Legislative Assembly inthlan leh kumin kum tira Lok Sabha inthlante pawh harsatna lian tham awm lovin boruak ralmuang tak hnuaiah hlawhtling takin kan buatsaih thei a ni. Tha thlah lova tan an lak avangin Dan in a phal loh ruihhlo leh thil chi hrang hrang narcotic drugs, zu, silai leh ralthuam tawlhruk, pawisa lem etc., thahnemtak man a ni a, kum kalta chhung khan Mizoram Police chhuanawm tak te hian hetiang danin a phalloh thil chi hrang hrang an man te hi cheng vaibelchhe 58.60 man hu lai a ni. ‘Assistance to States for Narcotic Control’ scheme hnuaiah heng ruihhlote man chhuak theitu uisathiam rual Canine Squad din tura hma lak mek a ni. ‘Prevention of Cyber Crime against Women and Children’ scheme hnuaiah Cyber Forensic Lab-cum-Training Centre din tura hma lak  mek a ni a. Khuarel chhiatna leh rikrum thila rang taka chet lakna tur ‘Emergency Response & Support system’ (ERSS) project ruahman niin niminpiah mai August ni 13, 2019 khan hman tan a ni a. Hei bakah hian May ni 28, 2019 khan Chhingchhip-ah police outpost thar hawn a ni a, Salem Veng leh Bethlehem Vengthlang, Aizawl-ah police beat post thar hawn ni bawkin Champhai district-a Farkawn khuaah pawh police beat post thar hawn a ni bawk. Lunglei Town Surveillance Project leh Khatla, Aizawl a Police Headquarters building thar cheibawl hna kalpui mek a ni a, Aizawl khawchhunga Police station zawng zawngah leh District Headquarters-a police station ah te child-friendly rooms  siam niin naupangte police station a thlamuang taka an awm theihna tura lo dawnsawn nan hman a ni.

Mizoram Forensic Science Laboratory (MFSL) hi sawrkar laipuiin Nirbhaya Fund Scheme kalpui tura Forensic laboratory 13 a thlanchhuah te zing ami a ni a. Nirbhaya Fund Scheme hian a tum ber chu hmeichhiate zahawmna humhim a ni a, mipat hmeichhiatna kawnga hmeichhia te chunga hleilenna case reng reng rang taka chinfel a thil tisualtu hremna pek hi a tum ber a ni a, hemi kawnga DNA leh Cyber forensic thuam chak nan cheng vaibelchhe 4 leh nuai 19 ruahman a ni. MFSL hi India ram chhunga forensic laboratory zawng zawng zinga case pending nei lova chingfel nghal zel thin awmchhun a nih bakah  India ram forensic laboratory te zinga online hmanga kuthnu chhuina case update reng thei awm chhun a ni bawk.

4.         Tan in (prison) inenkawlna hi sawrkarin a ngai pawimawh em em a, lung in tang te hmakhua leh hamthatna a ngaihtuah reng thin a ni. Hmeichhe pual bik jail pawh tunhnai maiah khan sak zawh niin luah fel tawh a ni a, Central Jail, Aizawl ah Auditorium sak mek niin Centrail Jail panna kawng chei that hna pawh thawh zawh tep a ni a. Mipa lung in tangte zingah natna inkaichhawn theih vei an awm palh a enkawlna tur Isolation Ward pawh sak zawh tep a ni bawk. Saitual sub-jail leh Kolasib District Jail a Male Convict Ward sak hna pawh zawhfel tep a ni tawh bawk.

5.         NITI Aayog in hriselna lama hmasawnna tehna kumin June thla a a tihchhuahah Mizoram chu India rama state tenau te zingah pakhatna niin India ram pum huapin pahnihna a ni a, hriselna kawngah hma kan sawn zel theih nan kawng hrang hrangin ruahmanna kalpui mek a ni. Sub-Centre hrang hrangte pawh tihchangtlun zel niin nau neih theihna tura buatsaih mek a ni a, thingtlang leh hmun kilkhawr zawka sub-centre engemawzat chu tihfel tawh a ni. Hei hian SEDP thil tum pakhat Infant Mortality Rate leh Maternal Mortality Ratio tih hniam kawngah nasa takin a puih ngei beisei a ni. Kum kalta chhung khan National Programme for Control of Blindness & Visual Impairment (NPCBVI) hnuaiah a thlawnin mit thalo 3008  zai a ni a, sikul naupang mit thalo 50,794 hmuhchhuah niin tarmit 2599 a thlawna pek an ni a, hei bakah hian  kum upa mi 3712 hnenah a thlawnin tarmit sem a ni bawk.

Sawrkar laipuiin Siaha, Champhai, Serchhip leh Kolasib General Nursing & Midwifery School sak nan cheng vaibelchhe 10 theuh a ruahman a, Lawngtlai, Mamit leh Aizawl  a Auxiliary Nursing & Midwifery School sak nan cheng vaibelchhe 5 theuh a ruahman bawk a, tun dinhmunah Champhai leh Siaha a GNM School Administrative-cum-Teaching block leh Aizawl leh Mamit a ANM School te sak zawh tawh a ni a. Serchhip GNM School,  Kolasib GNM School leh Lawngtlai ANM School a Administrative-cum-Teaching block leh Hostel block te sak zawh tawh a ni bawk.

6.         Kum 2018-2019 chhungin High School Science zirtirtu 66 leh Mathematics zirtirtu 48 lak thar an ni a, Private Middle School 7, High School 25  leh Higher Secondary School 43 chu Adhoc Lumpsum-GIA dinhmunah hlankai an ni bawk. Hemi hun chhung vek hian RMSA hnuaiah school 89 and  staff quarters 202 sak zawh a ni bawk. SSA hnuaiah kum kalta chhungin zirlai naupang 1,07,165 a thlawnin zirlaibu pek an ni a, zirlai naupang 98,086 school uniform a thlawnin pek an ni bawk. College bus thar 9 lei niin a mamawh College te hnenah pek a ni a, RUSA hnuaiah Assistant Professor 62 lak an ni a, Model Degree College ah college pali hlan kai tur niin hemi atan hian cheng vaibelchhe 16 hmuh a ni a, College 13 tan Infrastructure grant cheng vaibelchhe 26 hmuh a ni bawk.

7.         Kuthnathawktute thlai tharchhuah hralhna tur bazar changtlung tak siam hi kan thiltum pawimawh tak pakhat a ni a. Hei hian mi tam tak, a bik takin hmeichhia leh mi harsa zawkte tan eizawnna mumal tak a siam sak thei dawn a ni. Commerce & Industries department hnuaia Commerce Wing chuan kan bazar neihte thawm that bakah bazar thar sak hna te a thawk mek a, NEC hnuaiah cheng nuai 1300 in Dawrpui, Aizawla New Market building thar sak zawh tawh a ni a, Foreign Lane hmun hi Aizawl City Centre Annexe building sakna tura ruahman a nih avangin Foreign Lane a dawrkaite chu New Market Bulding ah hian sawn luh an ni ang a, an insawn luh fel hnu ah Aizawl City Centre Annexe building sak hna thawh tan a ni ang. NEC hnuaiah tho Mission Veng Bazar Complex sak zawh fel a ni a. Ministry of Commerce & Industry hnuaia Export Development Fund (EDF) kaltlangin Lawngtlaiah Trade Facilitation Building Block ‘A’ sak hna leh a hmunhma chei that hna thawh zawh a ni a, building Block ‘B’ leh Staff Quarters sak hna thawh tan thuai a ni ang. Zorinpui Land Custom Station sak zawh a nih hnu chuan Lawngtlai Trade Facilitation Centre hi Act East Policy tihhlawhtlinna hmanraw pawimawh tak a ni dawn a ni.

Mizoram sawrkar chuan Indo-Myanmar insumdawntawnna a ngaipawimawh hle a, Border Haat sakna tur hmun li - Hnahlan, Zote, Vaphai (Saikhumphai) leh Sangau (Pangkhua)-ahte hmunhma thlan fel a ni tawh a, hemi atan hian ram pahnih ten Memorandum of Understanding (MoU) leh Mode of Operation (MoO) an ziak fel tawh a ni. Tiau leh Kolodyne lui chunga lei dawh turin India leh Myanmar aiawh ten joint survey an nei tawh a, Mizoram leh South-East Asia ram te insumdawn tawnna kawng awmchhun Zokhawthar Land Custom Station (LCS) pawh Land Custom Station puitling ni tura ruahmanna siam mek a ni. Bangladesh nen a kan insumdawntawnna atana pawimawh tak Tlabung Trade Facilitation Centre chu sak zawh tawh a ni a. Tunah hian sawrkar laipuiin Marpara, Tuipuibari, Silsuri leh Nunsury  ah Integrated Check Post (ICP) siam turin hma a la mek a, Kawrpuichhuah ICP sak hna pawh tan thuai tum a ni.

Agricultural Produce and Livestock Marketing (Promotion and Facilitating) Act, 2017 hman thuai a nih theih nan hma lak mek a ni a. He Act hian kuthnathawktuten an tharchhuah te hlawk zawka an hralhna tur market a ngaihtuah dawn a, kharchhawng tihbo a tum bakah kuthnathawktute sum lakluh tihpun dan tur a ruahman dawn a ni.

Ramri a Zorinpui LCS thlunzawm tur Kaladan Multi Modal Transit Transport Project (KMMTTP) chu  Mizoram PWD chuan a siam mek a, sawrkar kum tharah zawhfel hman beisei a ni a. KMMTP hian South East Asia ram te nen kan inkalpawhna kawng a hawng dawn a ni.

8.         Kawlphetha siamchhuah kawngah nasa takin hma kan sawn a, 20MW Vankal Solar Park leh 2MW Tlungvel Solar Park te hi sawrkar kum tharah zawh fel hman beisei a ni a, Aizawl khaw chhunga 33/11kV Sub-Station te tih len hna kalpui mek a ni a, 132kV Sub-Station Zuangtui tih len hna pawh 25MVA transformer pahnih cheng nuai 703.42 senga bunin zawh fel a ni tawh bawk a ni. Mamit District in  kawlphetha mumal zawka an hmuh theih nan Sihhmui-Lengpui Airport 132kV line siam mek niin kum tharah zawhfel hman beisei a ni a. Bukpui-Khawzawl via East Lungdar 132kV line pawh siam mek niin he hna hi thawh zawh a nih hunah chuan Champhai District in 132kV Sub-Station, Zuangtui leh 132kV Sub-Station, Bukpui atangin kawlphetha an hmu tawh dawn a ni. NABARD hnuaiah cheng nuai 7340 man 5MW Tlawva SHP leh cheng nuai 4960 man 4MW Kawlbem SHP sak mek niin kumin chhunga zawh fel hman beisei a ni a. Sawrkar laipuiin cheng vaibelchhe 465 senna tur 24MW Tuirini Hydel Project min pawmpui tawhin thil pawimawh tihfel ngai la awm te tih zawh a nih veleh hna thawh tan a ni ang. Bairabi-West Phaileng via Mamit 132kV hi June, 2020 ah zawh fel tum a ni a, Melriat - Khawiva 132kV line leh Aibawk-Sialsuk 33kV line pawh zawh fel tep a ni tawh bawk. DoNER kaltlanga sak 33/11kV Sub-Station Lawngtlai, 33/11kV Sub-Station Siaha leh 33 kV line Kau-Tlabung SHP to Thenhlum te hi kumin chhunga zawh fel beisei a ni.

Mizoram hi India hmarchhak state zinga SAUBHAGYA (Pradhan Mantri Sahaj Bijli Har Ghar Yojana) scheme tihlawhtling hmasa ber kan ni a, chhungkaw 25,755 kawlphetha pe tura Sawrkar laipuiin min tuk chu kan tihlawhtling tawh a ni. Rural Electricity Distribution Backbone Scheme hnuaiah Rabung, Khawlailung, Mualthuam North, Tawipui North, Bualpui NG leh Phura ah te 33/11kV Sub-Station thar sak mek a ni a.  He scheme hnuaiah tho hian kilometre 189 a thui 33kV line leh kilometre 85.63 a thui 11kV line siam mek a ni a, Sub-Station awm sa 12 tih len a ni bawk.

9.         Chhuan lo la awm zel tur tena an chhawr tangkai theih tura khawpuia hmasawnna hi sawrkar ngaih pawimawh a ni a. Urban governance, urban planning, urban transportation leh vahvelna awlsam te bakah khawpuia rethei an tlem theih nan chawl lovin hna a thawk a ni. Aizawl khawpuia traffic tawt lutuk tih ziaawm nan ruahmanna thar PAHOSS (Parking House Support Scheme) chu tunhnai khan sawrkar-in a takin a kalpui a. He ruahmanna hnuaiah hian Aizawl khawpuia traffic tawt tih ziaawm nan sawrkar chuan mimal thlanchhuahte hnenah pawisa pe in anni hian lirthei dahna tur 'parking lot' an sa dawn a ni. He ruahmanna atana hman tur hian cheng vaibelchhe 60 dah a ni a, a tul ang zelin pawisa te hi dah belh leh a ni ang. Aizawl Smart City ruahmanna in a tum ber chu Aizawl hi chhuan lo la awm zel turte tana chenna tlak khawpui din a, a chhunga cheng zawng zawng te tana chhawr tangkai theih tur service siam leh a nihna pangngai hloh lova technology hmanga hmasawnna hrang hrang thlen hi a ni. He ruahmanna atan hian cheng vaibelchhe 2053.01 hman tura duan a ni a, hengte hi Smart City Fund, Swatch Bharat Mission(Urban), AMRUT, PMAY, NULM leh NLCPR adt., atanga hmuh tur a ni.

Aizawl khawpui chu kumin October ni 2-ah "Plastic Free City" a nih theih nan hmalak mek a ni a. Aizawl Municipal Corporation (AMC) chuan tun hnai khan "AMC Solid Waste Management Bye-Laws, 2019" chu hman turin a pawm a. Hei bakah hian AMC hian AMRUT ruahmanna hnuaiah project hrang hrang a kalpui mek a, Municipal Area huam chhungah hian Major Project 15 atan DPR a siam bawk a, chung zingah chuan Bawngkawn Fly-over siamte, Vaivaikawn junction siam that  leh Chaltlang-a Bus Terminal siam te a tel a ni. AMC hi digitisation mode-a inthlak turin a kal mek a, tun atanga rei lo te ah E-Governance hi a takin office inrelbawlna ah a kalpui dawn a ni.

10.      Mi tinin tui thianghlim in tur leh inthiarna thianghlim kan neih theih nan sawrkar department leh khawtlang hruaituten hma an la nasa hle. Nikum khan Mizoram chu Open Defecation Free (ODF) ah puan a ni a, ODF-a puan State 13-na a ni hial a ni. Tunah hian India rama State fai ber ni turin hmalak mek a ni. Kum kalta atang khan PHED hian an hmalakna hrang hrangah hlawhtlinna an hmu a. NLCPR hnuaia siam Khawbung WSS chu 2018-19 khan zawhfel a ni a, Sainik School Chhingchhip Water Supply leh Keilungliah-a Dam Reservoir & Development of Recreation Centre hna te chu kalpui a ni a. NABARD hnuaiah Sialsuk leh Samlukhai WSS, Leite leh Rotlang WSS te chu 2018-19 khan zawhfel a ni bawk. N.Thingdawl WSS , Phullen leh Thanglailung WSS, Sailam (Pumping, Aug) WSS, Vanbawng WSS (Solar Pumping),  Rulkual, R. Vanhne, Paithar leh Saikah (Solar Pumping) WSS bakah  Mimbung leh  Hrianghmun WSS (Combined Solar Water Supply Scheme) te chu pawisa awmdan a zirin thawhzawh thuai tum a ni. NEC hnuaiah Vairengte WSS, Sangau WSS Phase-II leh Bualpui NG & Lungzarhtum WSS te chu 2018-19 khan zawhfel a ni. 10 % GBS (Gross Budgetary Support) hnuaia siam Greater Khawzawl WSS leh Biate WSS te chu zawhfel thuai beisei a ni a. Mizoram chhunga notified town 22 leh city 1 tan chak takin Urban Water Supply ruahmanna kalpui mek a ni a, khaw 15 (70 lpcd & above) chu thawh zawh tawh niin 8 (below 70 lpcd) te chu zawhfel an la ni lo thung. Mizorama khaw awm zawng zawnga tui thianghlim in tur pe tur hian department chuan hma la zel a ni. PHED hian sawrkar kum kalta chhung khan House Water Connections 4235 a pe chhuak mek a, cheng nuai 4320 lakh la lut tura tuk an nih laiin cheng nuai 4479 lai a la lut a ni.

11.      Himalaya tlangdunga awm kan nih avangin Mizoram leilung hi a naupang a, hei vang hian khuarel chhiatna - lirnghing, cyclone, leimin, tuilian etc.,  tuar nasa thei zinga mi kan ni. South-West Monsoon kalkawnga awm kan nih avang hian fur a na a, hei vang hian kum tin leimin leh tuilian vangin harsatna kan tawk a, nunna chan an awm bakah chenna in leh bungraw chhia tam tak a awm thin a ni. Disaster Management and Rehabilitation Department chuan chhanchhuah hna leh chhawmdawl hna a thawk thin a, hei bakah hian mihringin kan tawh theih chhiatna chi hrang hrang laka kan him theih nan hma a la thin a ni. State, District leh khawtlang huapin Mock Drill a buatsaih thin a, heng te hi chhiatrupna a thlen hun pawh a mipuiten insaseng dan emaw, inven dan emaw kan lo thiam theih nan a ni. Nikum chhung khan Central Training Institute, Sesawng leh State Training Centre, Tanhril atangin volunteer 200 ten hlawhtling takin training an nei a. NH-54 siam thatna tur leh Hunthar Venga lei tlahniam siam thatna tur ruahmanna DPR chu Ministry of Home Affairs in a pawm tawh a, a senso tur cheng vaibelchhe 15 chu tun atanga reilote ah min rawn pek beisei a ni.

12.      Geology and Mineral Resources Department chuan Mizoram chhunga leimin awm theihna hmun te hrechianga, zirchiang turin hma a la mek a. Mizoram chhung lei leh lung te zirchianna tur Geotechnical Laboratory pawh tihchangtlun mek a ni a. Chhiatrupna lo thleng thut thei laka invenna atana tangkai tak tur ‘Delineation of Urban Development Zones with Special Reference to Landslide Risk and Slope Stability of Aizawl City, Mizoram’ chu siam zawhfel thuai a ni dawn a. Aizawl khawpui chhung hmun hrang hranga in sakna hmunah Geotechnical investigation chi hnih Core Drilling leh Pile Drilling tih thin a ni bawk.

13.      Agriculture leh allied sector te hi kan economy innghahna an ni a, mipui tam zawk a bik takin thingtlang mite tan phei chuan eizawnna atana an inghahna ber anih avangin a pawimawh em em a ni. Loneitute leh kuthnathawktute tharchhuah a pun theih nan kawng hrang hrangin hmalak a ni a. Sub-Mission on Agriculture Mechanisation (SMAM) hnuaiah loneituten an hnathawhna atana an hman tur khawl leh bungraw dangte man tlawm zawkin pek an ni a, tractor 200 chuang leh power tiller 1500 chuang pek chhuah tawh a ni. Oil Palm chinna hmun a pung zel a, kum kalta khan Hectare 25,923 a zau ramah chin a ni. Vawiin thlengin Oil Palm rah cheng vaibelchhe 14.159 man, metric ton 26,286.082 zet company hrang hrang hnenah hralh tawh a ni a. RKVY, NMOOP leh scheme dang atangin Agriculture Department chuan link road kilometre 1276 a thui a lai tawh a. Agriculture lama hmalakna leh loneitute tana hriattur pawimawh te awlsam zawka hriat a nih theih nan State Agriculture Portal loneitu.nic.in chu siam a ni bawk.

14.      Horticulture Department chuan cluster mode a thlai ching turin hma a la a a bik takin off-season tomato leh zikhlum ah hlawhtlinna hmuh chhoh mek zel a ni a. MIDH hnuaiah off- season zikhlum ching tur hian hma lak  a ni a, zikhlum quintal 6080 tharchhuah niin cheng nuai 302.00 hmuhchhuah a ni. Hei bakah hian off-season tomato hi quintal 2944 tharchhuah a ni a, cheng nuai 117.00 hmuhchhuah a ni bawk. Tun hnaiah Sechhip District-a Leng khua ah Protected Cultivation hlawhtling taka kalpui a ni bawk. Dragon Fruit chin hi nasa taka kalpui mek a ni a, Mizoram chhung leh India ram chhung hmun dangah te hralhchhuah beisei niin kum 2019 chhungin metric ton 50 thar chhuah beisei a ni. Mandarin Orange tam zawk thar chhuak turin a chinna hmun te siam that mek a ni a, kum 2018-19 chhung khan hectare 350 a zau ah hmalak niin metric ton 5399.7 thar chhuah a ni a, kum 2017-18 chhunga thar chhuah aiin metric ton 997.7 in a tam a, a chingtute sum lakluh pawh a vaiin cheng nuai 1536 vel a ni. Thal laia tui lakna tha neih a pawimawh tih hriain cheng nuai 216 sengin loneitute tan tuizem lian (water tank) 480 sak a ni. NABARD  hnuaia Warehouse Infrastructure Fund (WIF) kaltlangin Sairang leh Thingdawl ah Transit Godown pahnih cheng nuai 300 man ve ve sak a ni a, Siaha, Lawngtlai, Lunglei, Khawzawl, Ngopa, Serchhip, Thenzawl, Mamit leh Tuidam ah rural gowdown 9, Rs 100 lakhs man theuh sak a ni bawk. Kum 2018 khan Kolasib leh Mamit District ah te kuhva tam tak thar chhuah a ni a, Kolasib District bikah hian metric ton 3571 MT thar chhuah niin, cheng nuai 800  vel lakluh a ni a, Mamit District ah hian cheng nuai 1000 man vel kuhva rah metric ton 3920 tharchhuah a ni.

Technology Mission hnuaia siam Champhai-a Grape Winery, Champhai Grape Growers’ Society ten an enkawl mek chu tih changtlun mek a ni a, tunah hian litre 10,000 leng fermentation tank 10 siam a ni.

15.      Mizoram sik leh sa hi sericigenous insect leh anmahni chawm tu thlai Mulberry, Eri, Muga leh Oak Tasar te that theihna ram a ni a. Tunah hian khaw 209 a ram acre 5716 a zau ah Silkworm food plantation kalpui mek niin a chingtu mi 5651 an awm mek a ni. Kumin kum tir a Union minister for Textiles-in 'De­velopment of Eri Sericulture for the Upliftment of Aspirational District’  pali a hawn zingah mamit District tel ve in mamit district a chhungkaw 500 in an chhawr tangkai thei dawn a ni. Sericulture Department hian kumin February khan ‘Best NERTPS Projects Implementing State Award' chu Ministry of Textiles atangin a dawng a. Post-cocoon sector ah pawh hma la zelin, Mizoram ah Sericulture Industry in hma a sawn theih nan ram chhung leh ram pawn thlengin Mizoram thar chhuah silk hralhna tur zawn a ni a, Mizoram Sericulture Industry tan hma lam hun a eng hle a ni.

16.      Animal  Husbandry & Veterinary sector hi kan ram economy atana pawimawh tak niin GSDP 4% leh Agriculture and Allied Sector ah 30% an thawh a, Sawrkar pawhin a pawimawh zia hria in nasa lehzuala Animal Husbandary sector a hma kan sawn theih nan hma a la mek a ni. Government of India chuan Hmarchhak state-a vawk vulh (piggery industry) thar thawh lehna turin ‘Import of Pigs from UK for all N.E States’ programme a kalpui mek a, Mizoram sawrkar chu nodal department atan ruat nghe nghe a ni. Mizoram sawrkar chuan Thenzawl ah 'Goat Breeding Farm' a kalpui mek a, hei hi kel chi tha thar chhuahna tur a ni. hei hi Sial chi tha thar chhuahna tur in ICAR nen MoU an ziah a ni a, hemi atan hian Thenzawl ah Mithun Breeding Centre a siam a ni. NABARD RODF hnuaia din Tanhril a INDBRO Hatchery atangin thla tin ar no te 41000 hralh chhuah a ni. Mizoram chhim lamah artui hnianghnar zawka a awm theih nan Broiler Poultry Farm Lungpuizawl, Lunglei ah din a ni a, tun atanga hun rei loteah a taka hman theih a ni ang. Dairy industry thar thawh lehna turin sawrkar laipui ah project thehluh mek a ni a, hei bakah hian Kolasib, Lunglei leh Champhai-a dairy plants awmsa te chu tihchangtlun mek an ni bawk. Ran natna hrang hrang leh ran damlo te enkawl theihna turin Veterinary Hospital, Dispensary leh Rural Animal Health Centre zawng zawngah te cold chain facilities, damdawi tha leh hmanraw tha te pek mek an ni a. Phuldungsei leh Tuidam khua ah te Rural Animal Health Centre sak mek a ni.

17. Mizoram chhungah hmasawnna ruhrel tha kan neih theih nan hian North Eastern Council (NEC) hian nasa takin hna a thawk a. Planning & Programme Implementation Department hian NEC Nodal Department a nih angin hnathawh te a endikin a vil a. NEC hnuaiah hian project 45 thawh mek a ni a, event hrang hrang 14 NEC hnuaiah huaihawt a ni bawk a, zirlai ten zirna sang zawk an chhunzawm theih nan zirlai 40 hnenah kum kalta khan financial support pek a ni bawk. Non-Lapsable Central Pool of Resources (NLCPR) Scheme hnuaiah project 42, cheng nuai 53,946.66 man thawh mek a ni a. 2018-19 khan cheng nuai 5692.35 lakh hmuh niin he scheme hi tih tawp ani tawh a, North East Special Infrastructure Development Scheme’ (NESIDS) a thlak anih tak avangin hnathawh kal lai mek te March ni 31, 2020 a thawh zawk vek tum a ni. NESIDS hi Central Scheme thar niin, tunah hian Mizoram tana hnathawhna turin cheng vaibelchhe 186.30 ruahman a ni a, project pathum- Power, Water Supply leh Upgradation of Roads atan Rs 181.96 crore pawm a ni tawh a ni. Sawrkar hian Sustainable Development Goals (SDGs) a taka hman anih theih nan hma a la mek a, Committee leh Cell hrang hrang te hnathawh that avangin Mizoram chu India rama state zawng zawngte zingah point 59 hmuin tunah hian a titha 6-na a ni mek a ni.

18.      Zin mite tan Mizoram hi hmun nuam taka siam tum zel a ni a, Sawrkar pawhin hma nasa takin a la a, chung zingah chuan India hmarchhaka a hmasa ber atan  Swadesh Darshan Scheme hnuaia Thenzawl Golf Course leh Resort sak te a tel a ni.  Thenzawl Golf Course hi 18-hole course niin, eco-log huts 30 sak a ni bawk a ni. Heng bakah hian Tourism Department chuan Reiek leh South Zote khua cheiin, zin mite tlawh theih turin South Zote ah hian eco-friendly resort leh wellness spa siam tur a ni a, Reiek ah hian eco-adventure park leh ethnic village siam tum a ni. Sakawrhmuituai tlang-ah India rama a hmasa ber atan Skywalk siam tur a hmalak mek a ni. Mizo Unity Festival buatsaih nan Mizoram Sawrkar chuan cheng nuai 100 a ruahman a. Tourism Department chuan Youth Olympics, 2019 a Weightlifting Gold Medallist Jeremy Lalrinnunga chu Kum 2019-2020 chhung atan Brand Ambassador ah a ruat bawk a ni.

19.      Food, Civil Supplies & Consumer Affairs Department chuan furpui chhunga khaw kilkhawr leh kalpawh harsa zual ten buhfai an tlakchham loh nan supply centre hrang hrang  61-ah kumin November thleng tla tur buhfai a chhek khawl tawh a. Ration card digitization pawh zawhfel tawh ni niin hei hian ration card diklo hmuhchhuah kawngah nasa takin sawrkar a pui dawn a ni. Ration card  91.17%  chu Aadhaar Card nena thlunzawm a ni tawh a, beneficiary level ah 73.45% zawh tawh niin, hei hian public distribution system mumal zawka kalpui kawngah nasa takin a tanpui dawn a ni. Tun dinhmunah hian Mizoramah LPG Agencies 53 a awm a, Mizoram chuan LPG Gas Supply hnianghnar takin a hmu a ni. Sawrkar laipui atangin Kolasib, Chawngte, Tlabung, Hnahthial leh Aizawl a Working Standard Laboratory sakna tur cheng vaibelchhe 3.25 hmuh a ni a, cheng nuai 20 sengin  Kolasib ah Tank Lorry Calibration Centre sak a ni bawk.

20.      Department of Science & Technology chuan phuai hman tangkai a nih theih nan Baktawng khuaah Stardust to Charcoal Making Project a kalpui a, chhiatrupna laka invenna tha Mizoram in a neih theih nan Hazard, Risk & Vulnerability Analysis chu kalpui a ni. Digital 3D Terrain Mapping & Modelling for Mizoram chu hlawhtling taka zawh fel niin he project hian North East Technology Sabha Award 2018 a dawng nghe nghe a ni.

21.      NEC hnuaiah cheng vaibelchhe 6.19 sengin Vaivakawnah Cultural Centre-cum- Auditorium sak mek a ni a,  September tha hian zawhfel hman beisei a ni a. Special Priority Assistance hnuaiah Bawngkawn Chhim veng ah Cultural Centre sak mek niin kumin chhunga zawhfel hman tum a ni. Falkawn a Mizo Typical Village (Zokhua) pawh cheithat mek niin mizo in thar sak belh mek a ni a, reilote ah mipui vantlang tlawh theih tura hawn theih beisei a ni. Lawngtlai ah Lai Cultural Centre-Cum-Auditorium sak mek a ni a, Maubuangah North East Zone Cultural Centre Regional Centre hmun tur ruahman mek a ni bawk. Mizoram State Archives digitization kalpui mek niin lehkha pawimawh nuai khat chuang record fel ani tawh a, Mizo puan chi hrang hrang Puanchei, Pawndum, Ngotekherh, Hmaram leh Tawlhlohpuan te tihbawrhban anih loh nan geographical indication/patenting tihfel ani tawh bawk a ni.

22.      Forest Survey of India (FSI) chhinchhiah dan in Mizoram ah hmun hring square kilometer 18,653 kan nei a, Environment, Forests & Climatic Change chuan kan ramngaw neih te hum hima ramngaw siam belh leh nungcha humhalh kawngah nasa takin tan a la a ni. Green India Mission hnuaiah Aizawl, Kolasib, Darlawn, Thenzawl leh Champhai Forest Division huam chhungah thing chi hrang hrang hectare 19643 a zau ah phun a ni a, kum 2018-2019 chhungin heng thingphun leh enkawl zuina tur hian cheng nuai 2236.42 hmuh niin Forest Development Agency leh Village Forest Development Committees te nen tangrualin heng thingphun te hi enkawl a ni. Mizoram State Action Plan on Climate Change (SAPCC) siam mek a ni a, scheme thar The Mizoram Rewards for Detection of Forest and Wildlife Offence Scheme, 2019 pawh hman tan niin, he scheme thar hnuaiah hian ram leilung hausakna leh nungcha te tichhia leh tichereu zawnga hma la te hremna leh chung ho report tu hnena lawmman pek tur te a tel a ni.

23.      Pradhan Mantri Krishi Sinchai Yojana (PMKSY)- ‘Har Khet ko Pani’  hnuaiah Minor Irrigation Project 36 kalpui mek a ni a, hemi atana sum ruahman zat chu cheng nuai 4246.92 niin hectare 1723 a zau a huam a, beneficiary 1055 awmin kum 2019-2020 chhunga thawh zawh tum a ni. RIDF-XXII hnuaiah  Minor Irrigation Project 5 kalpui mek a ni a, RIDF-XXIII hnuaiah Minor Irrigation Project thar 4 kalpui mek niin kum 2019-2020 chhunga thawh zawh hman tura ruahman a ni. RIDF-XXIV hnuaiah pawh kum 2019-2020 chhunga thawh zawh hman turin Minor Irrigation scheme 6 kalpui mek a ni bawk. Kumin February thla khan ‘Mizoram State Water Policy 2019’ kalpui tan niin hei hian  khaw kheng leh tuilian vanga harsatna kan tawh tam tak te a sukiang thei tura beisei a ni a. National Water Mission tihhlawhtlin na turin ‘State Specific Action Plan (SSAP) for Water Sector’ duang turin hma lak mek a ni a, hemi atan hian Mizoram sawrkar chuan EPTRI nen MoU a ziakfel tawh a ni. National Hydrology Project (NHP) hnuaiah Hydrological Information System (HIS) changkang tak siam tura hma lak mek a ni a, kum 8 chhung atan cheng nuai 3,100 ruahman sak kan ni a, NHP hnuaia hma la tha State  thlanchhuah zingah pariatna dinhmun kan hauh mek a ni. Japan International Cooperation Agency (JICA) tanpuina in ‘The Project on Capacity Enhancement for Sustainable Agriculture and Irrigation Development in Mizoram’ kalpui mek a ni bawk.

24.      NABARD RIDF Scheme hnuaiah Land Resources, Soil & Water Conservation Department chuan cheng nuai 311.21 sengin hectare 370 a zau Rubber Plantation a siam a. State Priority Project hnuaiah cheng nuai 515.39 sengin Retaining wall, Rigid Pavement engemawzat a siam a, cheng nuai 494.01 sengin kilometre 60 a thui Rubber Plantation Link Road 6 a siam bawk a ni..

25. Department of Taxation chuan Kum 2018-2019 chhungin Revenue cheng nuai 57888.31 an la lut a, an target cheng nuai 37,000 an khum hneh hle a ni. Value Added Tax (VAT) lak thin chu Goods & Services Tax (GST) a thlak a ni a. The Mizoram Goods & Services Tax Act & Rules, 2017 chu khawng taka kalpui niin nikum a revenue an hmuh aia tam kumin hian hmuh beisei a ni.

26.      Kum 2018-2019 chhungin kilometre 126.84 a thui kawng laih thar a ni a, kilometre 326.106 a thui kawng chhuat Black-topping zawh a ni. PMGSY, NEC, NABARD, NEDP hnuaiah cheng vaibelchhe 992.81 sengin kawngpui 110, a vaia a thui zawng belhkhawm kilometre 1332.85 siam mek a ni a. Lei pali –  Tlawng lui Bairabi-Zamuang road, Tut Lei, Tuirini Lei leh Aizawl Lei te dawh zawh a ni a, CRF, NABARD, NEC, ADB, NEDP leh MORT&H hnuaiah temporary bridge 31 chu permanent bridge a thlak turin dawh that mek a ni bawk. MPWD Vision 2030 chuan Mizorama temporary bridge an enkawl zawng zawng te chu kum 2030 ral hma a permanent bridge a thlak vek a tum bawk a ni. Kum 2018-2019 chhungin cheng vaibelchhe 520.42 senginbuilding 102 sak a ni a, heng zinga 36 te hi sak zawh tawh niin building 66 sak mek a ni. PMGSY hnuaiah khaw 169 villages thlunzawm ani tawh a, kilometre 2003.30 a thui laih zawh tawh niin kilometre 933.160 a thui kawng chhuatphah Black-topping zawh tawh a ni a, tunah hian kawng laih lai mek 193 a awm a ni.

World Bank Project atangin Chhumkhum-Chawngte Road te, Champhai-Zokhawthar Road te, Tlabung-Kawrpuichhuah Road siam that hna thawh mek a ni a, heng kawng zawng zawng te hi two-lane National Highway Standard a siam niin kum 2020 chhunga zawhfel hman tum a ni. Asian Development Bank kaltlanga  Serchhip-Thenzawl-Buarpui kawng chei that hna thawh mek pawh March, 2020 a zawhfel hman beisei a ni bawk.  Mizoram PWD chuan National Highways kawngpui 11, a vaia belhkhawmin kilometre 1465.120  a thui a enkawl a. Kilometre 99.83 a thui Kaladan Multi Modal Transit Transport Project, vaibelchhe 1011.52 senga thawh mek  chu kumin December thla hian zawh fel hman tum a ni bawk.

27.      Khawtlanga chhawmdawl ngaite dawm kan nan kawng hrang hranga hmalakna kalpui a ni a. Cheng Nuai 88.11 sengin Tribal Art Centre, Tanhrilah Mitdel hawrawp chhutna hmun siam turin ruahmanna a kal mek a ni a. Rilru lam a harsatna nei enkawl dam tawh, chhungte belh tur neilote awmna atan Rehabilitation Home for Mental Patients sakna turin Cheng nuai 148.79 ruahman a ni bawk. ‘Support to TRIs’ scheme hnuaiah cheng nuai 2028.50 sengin Tribal Research Institute (TRI) sak mek a ni a, Pianphunga rualbanloten awlsam zawk a an pan theih nan sawrkar leh vantlang building te chu thawmthat a ni bawk. Tun hnai mai khan MoTA chuan Siaha ah Centre of Excellence for Sport (Boxing and Volleyball) sakna turin Cheng nuai 500 a rawn phal sak a, hmalak vat a ni ang. Lunglei leh Serchhip a Eklavya Model Residential School te chu CBSE hnuaiah class VI atanga class IX thleng zirna pek thar an ni a, Ngopa, Lawngtlai, Chawngte leh Tuipangah Eklavya Model Residential School te hi sak belh mek a ni bawk. ‘The Mizoram Juvenile Justice (Care and Protection) Rules, 2019’ duan niin Mizoram Gazzette ah tarchhuah tawh a ni. Tharum thawhna tuar tu hmeichhiate puih nan leh inthlahrung miah lova harsatna an tawh hun a an belh theih tur ‘One Stop Centre’ chu Aizawl, Lunglei leh Kolasib ah sak a ni a, Serchhip, Siaha, Lawngtlai, Mamit leh Champhaiah pawh One Stop Centre te hi hawn thuai beisei a ni. Hmeichhiate chhunga hleilenna awm thei ven nan Mahila Police Volunteers (MVPs) din a ni a, Aizawl ah mi 199 leh Lungleiah mi 100 te Police department ten thlang chhuakin training an buatsaih sak dawn a ni.

28.      Mizoram New Capital Complex (MINECO) Aizawl ah District Court Building, Aizawl sakna turin Cheng nuai 2360 ruahman a ni a, kumin December thla hian luah theih tur a a peih hman beisei a ni. MINECO a High Court Building sakna turin Cheng nuai 4624.12 ruahman a ni a, Lawngtlai, Champhai, Serchhip leh Mamit a Judicial Quarters sakte pawh zawh fel tep a ni a Siaha District Court building pawh sak mek a ni bawk. March ni 11, 2019 a Pu C Lalsawta’n Chairman pisa a luah atangin Mizoram Lokayukta pawh ngawrh taka kalpui a ni.

29.      Special Scheme for Recruitment of Peace Accord MNF Returnees, 2018 hnuaiah GAD a hna ruak 13 chu MNF Returnee chhungkua atangin kum 2018-19 chhung khan hnawhkhah a ni a, chungte chu Assistant grade 1, UDC 3, LDC 4 leh Group D 5 te anni.

30.      Mizoram Sawrkar leh Hmar People’s Convention (Democratics) ten April ni 2, 2018 a inremna thuthlung an lo ziah tawh angin HPC(D) mi leh sa ten lei rem an rah a nunphung pangngai an zawm theihna tur ruahmanna siam mek a ni a. Sinlung Hills Council tilian tura hmalakna pawh sawrkar kum 2019-20 chhungin tihfel hman beisei a ni a. Sinlung Hills Council Executive Member inthlanna felfai taka kalpui a nih theih nan ‘The Mizoram (Election to Sinlung Hills Council) Rules 2019’ chu hman tan a ni bawk.

31.      Mizo themthiam tak takte kutchhuak phochhuah nan Information & Public Relations department chuan kum 2018-19 chhung khan tum hnih lai New Delhi-ah Art Exhibition a buatsaih a. International Film Festival Guwahati, October 2018 leh International Film Festival of India, Goa ah November, 2018 te chhim turin Mizo Film siamtute a tir a. Film siamtute hman tur leh zinmite hip thei tur Film City, Ailawngah ruahman mek a ni a Mizo tihhmasawn nan leh Mizo film te chhuahtirna tur Mini Theatre chu Dinthar, Aizawlah sak mek a ni bawk.

32.      Mizoram sawrkar chuan thalaite thiamna tuai hriam a ngai pawimawh hle a, hemi atan hian Mizoram State Skill Policy for Development & Entrepreneurship a duang tawh a. Kuthnathawk a eizawngte tan Employees State Insurance Society a din a, kum 2018-19 chhungin kuthnathawktu 1228 ten Labour Welfare scheme hnuaiah hamthatna an dawng a ni. Champhai leh Serchhip ah ITI sak mek a ni a, Kolasib ah ITI sak hna hi tan ve thuai tura beisei a ni. UPSC leh SSC a thalai tam zawk an tlin theih nan Coaching programme buatsaih a ni a tunah hian UPSC atan mi 130 leh SSC atan mi 230 an in ziak lut mek a ni.

33.      Information & Communication Technology Department kaltlangin Mizoram-a Internet service leh Mobile phone signal tha tak neih a nih theih nan hma lak mek zel a ni a, Telecom Operator hrang hrangte sawipui an niin Site 712 an neih sa bakah kan mamawh phuhru pha tur site thar 759 siam belh turin hma  lak mek a ni. Mizoram chhunga mobile service-in a thlen phak lohna khuaten Mobile signal tha tak an neih theihna turin Mobile Tower thar 227 bun belh turin chak taka hma lak mek a ni a, heng zinga Tower 33 te hi a nung tawh a, Tower 70 dang pawh phun zawh fel a ni tawh bawk. Aizawl khawpui chhungah Mobile Tower bun belh a nih theih nan AMC Building Regulation siamțhat a ni a, ‘Mizoram Telecom Infrastructure Policy’ duan mek a ni bawk. GPON (Gigabit Passive Optical Network) Technology hmangin Mizoram Secretariat, New Capital Complex-ah internet pek a ni a, Secreteriat extension pawh pe vek tura hmalak mek a ni a. Thingtlang mipui ten hmunpui lam pan kher lova an kawtkai atanga sawrkar pisa an dawr theih nan hma lak mek zel a ni a, hemi atana pawimawh district hrang hranga sawrkar department-ten an hman atan internet 100 mpbs pe thei tur khawl bun turin chak taka hma lak mek a ni. Thingtlang mipuiten Internet Connection tha an neih theih nan khaw 501-ah VSAT bun sak tura hmalak mek niin, khaw engemaw zatah ‘Rural Information Technology Centre (RITC)’ dah tura hma lak mek a ni a, heng Centre ațang hian internet kaltlangin online-a doctor rawn theihna, thisen leh zun test-na, damdawi man tlawma lei theihnate pawh buatsaih tel a ni a. Online education chi hrang hrang kalpui a ni ang a, Bank awm lohna khuaah pawh Bank anga  hman theih turin buatsaih a ni bawk ang. Mipuite thil pawimawh hrilh hriat zung zung an nih theih nana Govt. of Mizoram Content Management System (website siamna) ICT Department-in a buatsaih chu sawrkar office leh organisation hrang hrang 250 laiin tha takin an hmang mek a. Cyber Crime laka sawrkar leh mipui kan him zawk theihna turin Computer Emergency Response Team (CERT-In) Laboratory nei thei turin NEC dawr mek a ni bawk. IT Education hmasawnna rah tha tak kan neih theihna turin Mizoram chhunga School 119 hnenah Computer set 7 theuh pe tura ruahmanna siam mek a ni a. IT lama hmasawn zelna atan leh zirlaiten tangkai taka an hman atan July 2, 2019 khan HSLC leh HSSLC Examination, 2019-a Topper mi 55 te hnenah laptop pek an ni.

34.      Kan thalai infiammite hmasawn zel nan kawng hrang hrang hma lak a ni a, tunah hian Mizoram Sports Policy duang turin ruahmanna chak taka kalpui a ni a. Tun sawrkar kum ral hma ngei hian National Games leh Khelo Youth Games kalphung zuiin Mizoram State Games neih tum a ni. Kum 2018-2019 chhung khan cheng nuai 800 sengin sports infrastructure kan neih zinga 75 lai thawmthat a ni a. Rajiv Gandhi Stadium, Mualpui-a eng chhit tur bun nan cheng nuai 800 ruahman a ni a, Republic Veng-ah cheng nuai 800 sengin Sports Hostel sak tura ruahman a ni a, Luangpawl, Mamit-ah Multipurpose Indoor Stadium changtlung tak sak a ni dawn bawk a ni. Mizo tlangval chhuanawm ritchawi chak Jeremy Lalrinnunga pawhin hmasawn zelin 2018 Summer Youth Olympic Games, Buenos Aires, Argentina a neihah khan Weightlifting-ah gold medal a la a, Summer Youth Olympic Games-a India ram tana gold medal la hmasa ber record a siam nghe nghe a ni. Hockey khel thiam Mizo nula Lalremsiami pawhin 2018 Summer Youth Olympic Games-ah tho hian India ram tan silver medal a hlawh chhuak a, hemi hma lawka Asian Games Indonesia-a neihah silver medal vaw chhuakin Mizo zinga Asian Games silver medal dawng hmasa ber a ni.

            Parade contingent zawng zawngte chungah lawmthu ka sawi a, vawiin a zirlai leh mipui lo kal khawmte, NGO, kohhran leh Mizoram mipuite chungah  sawrkar in thlawp na leh rinna innghah ngam avangin lawmthu ka sawi tak meuh meuh a ni. Mizoram hi hmasawnna kawng zawh turin a in puahchah mek a, ram ropui a kan siam theih nan tumruhna nen hmalam i pan zel ang u. State dangten zirna kawngahte, ralmuanna kawngahte, khawtlang nun nuam tak dinna kawngahte, hriselna kawngahte entawntlak a kan siam theih nan thawhpuiah ka sawm che u a ni. Vawiin kan neih theih nana an nunna hlantu kan mi huaisente hrereng ila, kan ram tan kan theih tawk i chhuah theuh ang u. Inkutsuihin, lungrual takin hmalam i pan zel ang u.

Ka lawm e.

JAI HIND