3717/2022-2023

Aizawl, the 1st March, 2023: India Formosa Foundation bultumin nimin February ni 28 chawhnu dar 2:00 khan Chief Wildlife Warden Conference Hall, MINECO-ah Champhai District-a YMA branch hrang hrang 21 bakah, Sub-Hqrs. YMA, Champhai leh Urban PHC, Champhai Vengthar-te hnenah Oxygen Concentrator leh Champhai District Hospital tan Mobile Ventilator hlanna inkhawm buatsaih a ni. He hun hi EF&CC Department changtu Minister Pu T.J. Lalnuntluanga, Champhai South bialtu MLA ni bawk chuan khuallian niin a hmanpui a ni.

Pu T.J. Lalnuntluanga chuan India Formosa Foundation-in Champhai District-a khaw hrang hrangte leh mipuite tana thil hlu tak an hlan chu lawmawm a tih thu sawiin, Pathian malsawmna a let tam tak a dawng tura a duhsak thu a sawi a. Oxygen concentrator leh ventilator-te hi mipui tana tangkai leh mamawh, natna khirh tak tak tuartute nunna chhan theitu a ni a, hetiang thilpek hlu tak hlan nachang hretu India Formosa Foundation-te rilru put hmang chu a fakawm hle a ni, a ti bawk.

EF&CC Minister chuan sawi chhunzawmin, India Formosa Foundation bultuma Oxygen Concentrator leh Mobile Ventilator sem chu a dawng tur dik tak, tanpui ngaite tanpuina kawnga hmahruaitu YMA te leh Hospital tana pek a ni chu lawmawm a tih thu sawiin, midangte tana luangchhuak nasa apiangin chunglam malsawmna an dawnglet thin a ni, a ti a. Bible-in min zirtir anga 'midang tana malsawmna' ni zel turin kal khawmte a chah bawk.

Champhai District-a YMA Branch hrang hrang, Sub-Hqrs. YMA, Urban PHC leh District Hospital tana Oxygen Concentrator leh Mobile Ventilator hlanna inkhawmah hian Pu Jonathan Lalremruata, Chairman, India Formosa Foundation chuan inhmelhriattirna leh report pekna hun a hmang a. Pu Lalzahawma Varte, Asst. Secretary, Sub-Hqrs. YMA, Champhaiin thu tawi sawina hun hmangin, Dr. Zatluanga, District Medical Superintendent, District Hospital Champhai chuan District mipui aiawhin lawmthu sawina hun a hmang bawk.