INTACH Mizoram Chapter leh School Education Department tangkawp chuan India Heritage Quiz-2014 chu vawiin khan Govt. Mizo High School, Aizawl-ah an buatsaih. He inelnaah hian hnam rohlu hrang hrang lama hriatna leh thiamna (heritage awareness) chungchangah school thlanbik 15 atanga zirlaiten ziaka inelna an nei a ni.

INTACH Mizoram Chapter chuan he inelna hian school naupangte hriatna tihzauin, an zirlaiah pawh a tanpui tur thu an sawi a. INTACH hmalakna hnuaiah school naupangte tan inelna hrang hrang buatsaih lo ni tawh thin in, tun tum hi a vawi li na a ni a. Rampum huapah pawh Mizo zirlai lawmman dawng an lo awm tawh a ni.

India Heritage Quiz-2014 hi INTACH-in rampum huap quiz a buatsaih a ni a. Zirlai class-7 atanga class-10 thleng tel theih niin, vawiina State level Quiz (written)-ah hian zirlai 100 bawr vel an tel a. Heta tithate hi Guwahati Zonal Competition-ah inel lehin, chuta tithate chu National Level intihsiakna a tel turin Delhi-ah an kal ang.