Kumin 2017 India Independence Day vawi 71-na, India in British sawrkar awpbehna hnuai atanga a indanna Ni champha chu ropui leh urhsun takin District Playground, Siaha-ah lawm a ni.

Vawiin India Independence Day lawmna a khuallian Pu Lalsawta, Finance Minister, Government of Mizoram chuan thu sawiin, Mizoram sawrkar chuan mirethei leh harsa zawkte khaichhuah nan leh leirem rahtir nan NLUP chak takin a kalpui mek a, Phase-I leh Phase-II zawhfel ni tawhin, Phase-III leh IV te hi nakum March, 2018 a zawhfel beisei a ni, a ti a. Mizoram sawrkar chuan NLUP chhunzawm nan ‘ New Economic Development Policy (NEDP)’ Comprehensive Growth Strategy for Mizoram chu ngawrh taka kalpui a ni a, Ram sum leh pai dinhmun chawikan na tura an pawimawh dan a zirin Project hrang hrang tan sum pekchhuah a ni, a ti a. NEDP atan hian kum 2016-2017-ah cheng vaibelchhe Rs.250 leh NLUP convergence sum cheng vaibelchhe 27 dah a ni a, kum 2017-2018-ah cheng vaibelchhe Rs.750 dah a ni. NEDP hnuaia hmalakna pawimawhte chu sumdawnna bul tanna tur tih hmasawnna atan Entrepreneurship Development Scheme (EDS) te, Agriculture leh Horticulture link road te, khawpui chhung leh thingtlang khua a hmasawnna ruhrel tih changtlunna te, Referral Hospital leh District Hospital tih changtlunna tur te, kawngpui, Tui, Power supply leh khawpuia service industry hrang hrang hmasawnna tur te leh thil dang tam tak te an ni a. NEDP hnuaiah hian CM’s Rural Housing Scheme pawh kalpui a ni,a ti.

Mizoram leh a chhunga cheng te hmasawn nan sawrkar chuan a bitum tur a bitum chat zel dawn a, mipui pawhin kan tihtur theuh ah rinawm tak leh taima taka tihturin  kan inpuahchah ve a ngai a ni ,a ti a. Vawiin India Independence Day lawmna-ah hian mipui te chuan khuallian hovin “ New India Pledge” sawi rualna hun an hmang bawk a ni.

India Independence Day lawmnaah hian Parade Contingents 19 awmin, Uniform Contingents 6 leh School Contingents 13 te an ni a. Uniform Contingents te zingah NCC Don Bosco School te chu pakhatna niin, pahnihna-ah 2nd Bn. MAP leh  Pathumnana-ah Scout & Guide te an ni.. School Contingents te zingah ECM Higher Secondary School te chu pakhatna niin, pahnihna-ah Little Diamond School leh pathumna-ah Children Training School te an ni. Hemi bakah hian Independece Day lawmna pual hian Football, Badminton leh Air Rifle Shooting-ah te Competition  buatsaih a ni a, heng Sports Discipline-a lawmman la te hnenah hian khuallian chuan lawmman  a sem nghal a ni.

Independence Day lawmna programme hman hma hian, tukin zing dar 7:00Am khan Finance Minister, Pu Lalsawta chuan CEM, MADC Bungalow cheng nuai Rs. 262 senga sak thar chu a hawng nghal a. He CEM Bungalow hi 28.3.2012 a sak tan niin, 5.7.2017 khan zawhfel a ni a. Zopa chhiara chhawnghnih niin, a inpumpui zauzawng hi 1095.175 Sq.m a ni a. Contractor Pu Joel Laichi Hlychho, Siaha in a sak hna hi a thawk a ni. 

Tukin CEM Bungalow hawnna ah hian thu sawiin, Pu Sawta chuan White House bangah chuan “He Inah hian mi rinawm leh mi dik chauh cheng rawh se” tih a intar a, chutiang bawkin he CEM Bungalow tha zetah hian, mi dik leh mi rinawm, Pathian tih mi chauh an chen zel theih nan MADC leh Maraland mipuite duhsakna ka hlan a che u, a ti.