India leh Bangladesh insumdâwntawnna hlawhtlinna tur atana hmalâkna kal zelah inrinni khan, Bangladesh ramchhungah ram pahnih aiawh mi pawimawhte an thukhâwm a; hetah hian Land Custom Station sakna hmun tur chungchang pawh chiang lehzuala zirho a ni.

Bangladesh State minister Dipankar Talukdar chuan, inrinni-a ram pahnih aiawhte inhmuhkhâwmna chuan rah tha a chhuah ngei a beisei tih sawiin, "Ram pahnihte insumdâwnna ringawt ni loin, ram pahnih inkara remna leh muanna a awm theihna tur pawhin hma kan lakho zel a pawimawh a ni." a ti a, hun remchang hmasa berah Indo-Bangla border Trade chungchang vêk ngaihtuahin an thukhawm leh dawn tih a sawi.

High Commission of India, Dhaka Pankaj Saran pawhin,ram pahnihte inkara boruak tha zâwk a inher chhuak mek chu lawmawm a tih thu sawiin, "He hun tha hi kan hman tangkai a pawimawh a ni." a ti a; Indo Bangla border hlawhtlinna chu ram pahnihte tan vanneihna thlentu a la ni dawn tih a sawi bawk.

Trade and Commerce Pu Lalrinliana Sailo pawhin, ram pahnihte insumdâwn tawnna turin ram pakhat chauhin hma a lâk a tâwk lo tih sawiin, "Ram pahnihin inlungrual taka hma kan lâk a tul a ni." a ti a, Indo-bang border trade chungchang sawipuiin Bangladesh ram hruaitute hrang hrangte an ramah a hmuh tawh thu leh boruak a kaltluan thu a sawi.

Inrinni-a meeting-ah hian Indo Bangla border trade Land Custom Station sakna tur chungchang zirhoa sawiho a ni a; hemi sakna tur atana hmun thum ruahman mek chu uluk zawka zirchian hnu-ah a rang lama tihfel thuai tum a ni a, hemi hnu-ah hian a sak puitlin hna pawh a rang lama thawh tum a ni.

Vawiin meeting-ah State Minister Chittagog Hill Tracts Affairs Dipankar Talukdar, Rangamati Hill District Council Chairman Nikhil Kumar Chakma, leh Chittagog Hill Tracts Secretary Nobo Bikram Kishwas Tripura te bakah, Trade and Commerce Minster Pu Lalrinliana Sailo leh amah tawiawmtu AH & Vety minister Pu Nihar Kanti Chakma bakah Trade and Commerce Joint Director-te an tel a ni.