Ni 19.7.2012 (Ningani) a India President thlan vawi 14-na lo awm tura hman tur ballot box leh ballot paper-te chu vawiin chawhma dar 11.40 khan New Delhi atangin Jet Airways thlawhna hmangin Lengpui airport rawn thlenpui a ni a. Heng thil pawimawhte hi nimin khan Pu H. Lalengmawia, Jt. CEO leh Pu Vanlalnghenga, Addl. Secretary, Mizoram Legislative Assembly te chuan Election Commission of India hnen atanga la chhuakin, New Delhi atanga Aizawl Treasury strong-room a dah luh a nih thlengin police-te venhimna hnuaiah India President thlanna tur ballot box leh lehkha pawimawhte hi dah a ni a. Heng thil pawimawhte hi chawhnu dar 1.45 khan Mizoram Legislative Assembly Secretary leh he inthlana Mizoram tana Returning Officer tura ruat Pu Ngurthanzuala hovin Aizawl Treasury strong-room-ah hian dah luh a ni.

Ni 19.7.2012 (Ningani) zing dar 10.00 atanga tlai dar 5.00 thleng Mizoram Legislative Assembly member-ten Assembly Building chhawng hnihna a Committee Room-ah vote an thlak ang a; ballot box hi a tuk ni 20.7.2012 ah New Delhi panpui a ni ang. Vote tlate hi 22.7.2012 (Pathianni) chawhma dar 11.00 atangin Returning Officer pisa, Parliament House, New Delhi-a Room No 63-ah chhiar a ni ang. India President thlanna tum 14-na lo awm turah hian Pu Purno Agitok Sangma leh Pu Pranab Mukherjee te chu candidate an ni a; India ram puma MLA leh MP-te vote belhkhawm hlut zawng chu 1098882 a ni. India President a tling tur hian vote tla zawng zawng atanga chhuta zaa 50 leh vote 1 hmuh a ngai a ni.

Attachment

  • Loading attachment...