2026/2023-2024

Aizawl, the 27th September 2023: Vawiin chawhma khan Bharat Mandapam, New Delhi a World Tourism Day lawmna neih a ni a. He hunah hian Reiek khua chu India rama tourism village tha ber - BEST TOURISM VILLAGE OF INDIA 2023 atan puan ni a. Gold Award hlan a ni. Reiek khua hi Gold Award dawng thei India ram pum atanga thlan chhuah village tha ber panga zingah a tel a ni. He chawimawina sang tak hi Pu Robert Romawia Royte, Tourism Minister chuan Union Tourism Secretary Pi V. Vidyavathi hnen atangin a dawng a ni.

Best Tourism Village hi Central Nodal Agency for Rural Tourism, Ministry of Tourism hnuai a mi in a buatsaih ni in Best Tourism Village thlanna Competition ah hian application 750 chuang, India ram district hrang hrang 315 leh State 31 atangin a lut a ni.

Best Tourism Village Competition hi kumin February ni 16, 2023 khan Ministry of Tourism chuan hawng tan in online portal ah application hi submit a ni a. Stage hrang hrang paltlangin September thla tir khan khaw tha zual 80 thlan a ni a. Heng thlanchhuah khuate hi National Evaluation Committee hmaah Power Point Presentation pek a ni a. Video clip te siamin submit a ni bawk a ni. A tawpah a ti tha zual khaw 35 thlan chhuah a ni a, Gold, Silver leh Bronze te pek an ni a. Hetah hian Reiek khua hi a sang ber Gold Award la thei panga zingah a tel ta a ni.

He award dawng thei tur hian tehna (evaluation parameters) hrang hrang Sustainable Development Goal te nena inzawm tlat pakua hman a ni a, chungte chu:

Cultural and Natural Resources, Economic Sustainability,Environmental Sustainability, Governance and Prioritization of Tourism, Health, Safety and Security, Promotion and Conservation of Cultural, Development of Social Sustainability, Tourism Development and Value Chain Integration, and Infrastructure and Connectivity.

Hetiang tehna hrang hrang a teh hian India rama titha ber khaw panga zingah Reiek chu puan a ni ta a ni.

Minister hi Pu V Lalengmawia, Joint Secretary Tourism leh Pu Lalrozama VCP Reiek leh mi pawimawh dang ten an tawiawm a ni.