Vawiin khan Addl D.C Pu H. Lianzela hovin D.C Conference Hall, Mamit-ah India Republic Day 2017 Mamita hman dan tur rel a ni.
Meeting hian India Republic Day 2017 chu GSA Playground-ah ropui taka hman nise tiin a rel a, chawhma dar 11:00 ah khuallian District Bawrhsapin Hnam puanzar a pawtpharh ang. Hemi ni hian Sorkar office tinte chu zing ni chhuah hma a hnam puanzar zar vek tura hriattir niin, Mamit khawpui chhunga kohhran hrang hrangte hnenah ram hruaitute tana tawngtai sakna nei tura ngen ni se tih a ni bawk. Republic Day 2017 lawmnaah hian Parade contingents 17 tel tur a beisei an ni bawk.
India Republic Day lawmna neih zawh hian District Hospital, Shelter Home leh District Jail-te khuallian hian tlawhin thilpek a hlan anga, chhun dar 12:30 ah sawm bikte pualin D.C Complex ah At Home neih a ni ang.
India Republic Day Mamit a lawmna pual hian kumdanga la tih ngai loh Department hrang hrang hmasawnna leh hmalakna pholanna tableau showcase Mamit-a Department hrang hrangte atangin entir a ni dawn bawk a ni.
Meeting-ah hian India Republic Day 2017 lawmna tura Department hrang hrangte mawhphurhna leh chanpual inpek a ni.
India Republic Day 2017 hman dan tur rela thutkhawmnaah hian Mamit khawpui chhunga Head Of Offices leh tlawmngai pawl hrang hrang hruaitute bakah khawtlang hruaitute an tel a ni.
