Mizoram atanga Bru chhuakte Mizorama let leh tura beihpui vawi tam tak thlak a nih tawh hnuah vawiin khan New Delhi ah sorkar laipui, Mizoram leh Tripura sorkar leh Bru aiawhten inremna thuthlung an ziak a ni. Ministry of Home Affairs Joint Secretary (NE), Mizoram Chief Secretary leh Tripura Chief Secretary te leh Mizoram Bru Displaced Peoples’ Forum (MBDPF), Mizoram Bru Displaced Peoples’ Coordination Committee (MBDPCC), Mizoram Bru Indigenous Democratic Movement (MBIDM), Bru Tribal Development Society (BTDS), Bru Displaced Welfare Organisation (BDWO) leh The Indigenous Progressive Regional Alliance (TIPRA) hruaitu theuh ten Home Minister Amit Shah, Mizoram Chief Minister Pu Zoramthanga leh Tripura Minister Pu Biplab Kumar Deb te hriatpuiin an hming an ziak a ni.

He inremsiamna hnuaiah hian November ni 30, 2019 hnu lama Tripura a Relief Camp a la awm mekte chu an duhthlanna in Tripura ah an cheng hlen thei dawn a. Repatriation lo kalpui tawh a Mizoram a kir leh te tan erawh Tripura ah let leh remtih a ni dawnlo a. Tripura sorkar chuan an state chhunga relief camp a cheng mek zat chu enfiahna thar hlak siam in, resettlement kalpui a nih zawh hnu chuan heng relief camp te hi khar tawh tur a ni. India sawrkar chuan sum leh mamawh dang Tripura sawrkarin a neih te theih ang chen chenah a pui dawn a ni.

Relief Camp atanga Tripira a awm nghet thar turte hi chhawmdawlna, Rehabilitation package chhungkaw khatah cheng nuai 4 zel  pek an ni ang. In sakna tur ram 30’x40’ a zau pek ni bawkin, in sak tanpuina cheng nuai khat sing nga theuh chhungkaw tin hi pek an ni ang. Heng bakah hian Tripura a awmna tur hmun thar an khuar tirh atanga kum hnih chhung chu chhungkaw tinte hi cheng 5000 theuh thla tin pawisafaiin puihna pek an ni ang a, ration a free in dawng bawkin, heng sum a puihna zawng zawng hi Direct Beneficiary Transfer scheme kaltlanga pek an ni ang. Tripura sawrkar chu a remchan dan angin heng Bru chhungkuate tan hian PRC leh ST certificate te buaipui sakin, electoral roll ah an hming te thun sak thuai tura beisei a ni.

India sawrkar chuan he inremsiamna bawhzui a nih dan te enzui turin Special Secretary (Internal Secretary), MHA kaihhruaina hnuaiah Joint Monitoring Committee a din ang.

Chief Minister Pu Zoramthanga chuan kum 22 hnu ah inremna thuthlung ziak a, felfai taka ruahmanna te siam fel a ni ta chu lawmawm a tih thu sawiin, he agreement hnuaia hmabak la awm te pawh tha taka kalpui a nih a beisei thu a sawi a ni. Chief Minister hi Chief Secretary Pu Lalnunmawia Chuaungo, OSD Home leh Addl. PS to CM ten an tawiawm a. He inremna thuthlung ziahnaah hian NEDA Convener Pu Himanta Biswa Sarma a tel bawk.