1315/2022-2023
Lunglei the 21st July 2022 : India ram zalenna kum 75 na (Azadi Ka Amrit Mahotsav) lawmna kal zelah vawiin chawhnu khan Pu M.Misael, Project Director, DRDA Office, Lunglei chamber ah Freedom Fighter Pu Darthawma Renthlei (L) leh Pu RK.Lalhluna, Padma Shri Awardee te chawimawina hlan an ni.

Chawimawina hlanna ah hian Pu M.Misael, Project Director chuan India ram zalenna lawmna (Azadi Ka Amrit Mahotsav) kal zelah India ram ah District 75 thlanchhuah ah Lunglei kan lang ve hi freedom fighter leh Padma Shri Awardee te vang anih thu a sawi a, Lunglei in hetiang mi chhuanawm kan nei hi lawmawm a tih thu a sawi bawk.

Pu R.Lalbiaktluanga, Pu Darthawma Renthlei (L) fapa in Pu Darthawma Renthlei (L) chanchin tlangpui sawiin, Pu Darthawma Renthei (L) hi kum 1920 khan Pukpui khuaah a piang a. November ni 27, 1940 ah British Army a zawm a. Kum 1941 khan Malaysia a thawn zingah telin kum 1942 khan Japan leh British sipaite chu Prisoner of War ah man niin Pu Darthawma Renthlei (L) pawh hi a tel a ni. Jail atanga a chhuah hnuin Indian National Army a zawm a, man niin kum 1946 ah chhuah zalen a ni. India ramin zalenna a hmuh hnuah Freedom Fighter of India ah pawm a ni a. India zalenna sualtute tana siam Tamrapatra Award chu August ni 15, 1973 khan hlan a ni. Pu Darthawma Renthlei (L) hi Lunglei Chanmari ah a nupui fanau te nen chengin July ni 21, 2019 khan a boral a ni.

Pu RK.Lalhluna, Padma Shri Awardee pawhin a chanchin tawi sawiin he programme-a a tel ve chhan pawh kan Freedom Fighter te zar liau liau a nih zawk thu a sawi. India ram zalenna lawmna pual a chawimawina a dawng chu thinlung takin a lawmawm a tih thu a sawi bawk. Pu RK.Lalhluna hi Mizo te tan a thu leh hla lam a thawh hlawk tak a ni a, kum 1991 khan Padma Shri Award hi dawngin tunah hian kum 84 mi niin Lunglawn Lunglei ah a khawsa mek a ni.