Nimin khan Myanmar leh India inkara India palai Pu Gautam Mukhopadhaya chuan Aizawl rawn thleng a. Parliamentary Affairs Minister Pu R.Romawia, Chief Secretary Pi L.Tochhong leh Chief Information Commissioner Pu Lal Dingliana te chu tlawh in ram tana thil pawimawh tak tak te a sawi pui. Hemi hnu hian Trade & Commerce Secretary PuB.Lalhmingthanga leh a thawhpuite bakah ah Mizoram Chamber of Commerce leh Mizoram Chamber of Industries a hotutechu Mizoram state Guest House Conference Room ah Indo-Myanmar Border trade a hmalak chhoh dan tur a sawipui a ni.

Ambassador chuan a rawn kal chhan ber chu Mizoram chhung leh ramri te hriat chian a duh bak ah India leh Myanmar inkara sumdawnna kawngpui a Mizoram hman tangkai dan tur kawng hrang hrang te rawn belchiang a nih thu a sawi a. Trade & Commerce hotute ngenna anga Zokhawthar a land Custom station, Mizoram sawrkar in hawn mai theih tura a peihfel tawh chu ataka hna a thawh theihnan Myanmar Sawrkar ah tihtur tul te bawhzui sak a tiam a. Sumdawng ten harsatna an tawh thin dan te ngaithla in a tul anga a tanpui tur thu a sawi a. Mizorama sumdawngte pawh Indo-myanmar Trade an chhawr tangkai theih nan Myanmar a hralh kal deuh te thlan chhuah kawngah ngaihtuahna seng se a tangkai hle a rin thu a sawi a.Zokhawthar hmuna sumdawnna a lo len zawk nan Rih-tiddim-kalaymyo kawngpui chu India in a pawimawhna a hria a. He kawngpui hi siam thuai a nih theih nan chak takin hma a la mek a ni a ti a. Mizoram ramri hrula khaw thenkhatte pawh border trade hmun atana a remchan dantur te pawh ngaihven reng anih thu sawiin Kaladan Multi-modal Transit Transport Project pawh a hun remchang hmasa ber ah tlawh a tum thu a sawi a ni. Pu Gautam Mukhopadhaya chuan Mizoram hian Education Service, Health Service, Power hralh chhuah turte, Industries leh kawng tam takah Myanmar mamawh leh chawk luh tur ah te thiamna leh theihna a nei a ni a ti. Mizoram ramri hrula michengte zawng zawng chu zohnahthlak tawng hrang hranga dawr vek theih anni leh zela, hei hian sumdawnna tha tak siam a awl phah lehzuala a rin thu a sawi a. Sumdawng hruaitute leh Trade & Commerce Department rawtna angin Trade delegates kalymyo atanga chahtur te leh mizoram sumdawngten kalymyo an tlawh theih nan Ministry of Commerce & Industry ah hmalak pui a tiam bawk a ni.

Ambassador hian vawiin hian Zokhawthar a Indo-Myanmar border trade centre a tlawh leh ang.