Indian Idol Contest 2009 ah Mizoram atanga contestants nei ve tura hma la mek tu Grand Society of Mizoram(GSM) chuan vawiin khan I&PR auditorium-ah contestant te thlitfimna Screening/Audition a buatsaih a. Mizoram Larsap Lt.Gen.(Rtd) M.M.Lakhera, PVSM,AVSM,VSM chuan he audition tanna inkhawm hi a telpui a ni.

 

 

Audition ah hian Mizoram chhung hmun hrang hrang bakah thenawm state atang te in contestants 74 an inlan a. Contestants te fuihna thu sawiin Larsap chuan India ram hmun dangte rualin Mizoramin ke a pen ve thei tih lantirna tha ber chu a taka entir a ni, a ti a. Mizoram-in talent tha tak tak a neihte chu tuaihnum a pholan a pawimawh hle a ni, a ti. Larsap chuan contestants te chu Mizoram aiawha Indian Idol thlanna a an tel hunah Mizoram timawitu leh tihming thatu ni turin awmdan mawi tak lantir zel turin a fuih a. Intihsiakna ah hnehtu a nih vek theih lova, a pawimawh ber zawk chu intihsiakna a tel kha a ni, tiin Larsap chuan hlawhtlinna kawng dik tak chu mahni thil tih atanga inzir chhoh leh tha zawka beih zui zel hi a ni, a ti.

He audition tanna hun hi Grand Society of Mizoram President leh Lelte Magazine Editor ni bawk, Pu C.Dinthanga’n a kaihruai a. Pu Z.Lalthanzuala, Gen.Secretary chuan GSM din chhan leh a thil tumte sawiin report a pe bawk a ni.