1247/2025-2026

Dated Aizawl: the 18 July 2025 : Vawiin khan Indian Red Cross Society (IRCS) Mizoram State Branch chuan  Salvation Army Indian Eastern Territory, Territorial Commander Office, Temple Square, Aizawlah, Sipaipawlin mamawhna apianga an hman atan  blanket 100 leh oxygen concentration 2 a hlan a. Indian Red Cross Society Mizoram State Branch aiawhin Chairman Pu H. Lalengmawia IAS chuan hlanin,, Sipai pawl aiawhin Col. Lalbulliana Tlau Territorial Commander Indian Eastern Territory-in a dawng a ni.

Bungraw inhlanna hunah hian IRCS Mizoram Branch chairman Pu H. Lalengmawia chuan thusawiin, "Salvation Army ten fahrah leh riangvaite chhawmdawla an hnathawh chu Indian Red Cross Society chuan  ropui a tih thu a sawi a.  A theih ang angin IRCS chuan chhawmdâwlna kawngah ke pen zel an tum a ni" a ti. 

Heng bungruate hi, Salvation Army enkawl; Boys Home Mualpui, Motherless Baby Home, Saitual (Hlimna In) leh Old Age Home Serchhipahte  sem chhuah leh tur a ni.

Indian Red Cross Society Mizoram State Branch-ah hian President chu Gen. VK. Singh Mizoram Governor niin, Pu H. Lalengmawia IAS chu Chairman a ni a. IRCS hian College hrang hrangah First Aid training te buatsaihin, tun hnai mai pawh khan Mizoram a raltlante leh a mamawh apiangte tan Blanket thahnem tak DM&R Department hnenah a lo hlan tawh a ni.