No.4308/2020-2021  

Aizawl, the 19th August 2020: Vawiin leh nimin khan Indian School Psychology Association (InSPA) leh Directorate of School Education tangkawp chuan Mizoram chhunga Secondary School zirtirtute tan zirlai naupangten rilru hrisel tak pu chunga nun an hman theihna tura an puih theih dan turte sawihona - 'International Online Workshop on Mental Health, Well-being and Life Skills' chu nimin leh vawiin khan neih a ni a. He hunah hian Pu James Lalrinchhana, Director, School Education Department chu khuallian a ni.

Sawihonaah hian Pu James Lalrinchhana chuan InSPA Mizoram leh School Education Department tangdunin tunlai boruak nena inmil tak thupuia hmanga International Online Workshop an buatsaih chu lawmawm a tih thu a sawi a. State hrang hrangin harsatna a tawhte a inang vek lo va, Covid-19 hripui lêng vanga hun engemaw chen inkharkhip kalpui mêkah naupangte chu a tuar berte zinga mi an ni a ti. Sikul kal theih loh a nih piah lamah infiamna leh inlenpawhte a rem bawk si loh avangin naupang tam takin harsatna an tawk a, naupangte harsatna tawh hi zirtirtuten an hriatthiam a tulzia he International Online Workshop atang hian hre thara a taka hmang nghal turin a fuih bawk a ni.

Dr. Panch Ramalingam, President, InSPA & APSPA pawhin he hunah hian thu sawiin he International Online Workshop hi a taka tangkai taka zirtirtuten hmang ngei tur leh in lam thlenga zirlaite dinhmun hrechianga an harsatna tawhte sutkianpuituah tang ngei turin duhsakna a hlan a ni.

He huna India ram chhung State hrang hrang atanga mi thiam bik resource person rawn tel te chu:
1) Dr. Shakila Azim, Associate Prof., Bihar.
2) Dr. S. Suresh, Associate Prof., Tamil Nadu.
3) Dr. Debdulal Dutta Roy, Associate Prof., Kolkatta,
4) Dr. Reena Singh, Faculty, Bhopal
5) Prof. T. Santhanam, Rehabilitation Psychologist, Chennai
te an ni a.

Ram dang (Foreign) atanga mi thiam bik Resource person rawn tel te chu:
1) Prof. Kamal Uddin, President, Bangladesh School Psychology Society.
2) Dr. Balan Radhakrishnan, University of Malaysia.
3) Dr. Parvathy Varma, Assumption University, Bangkok, Thailand.
4) Mr. Sameem, President, School Psychology Association, Colombo, Sri Lanka.
te an ni.

He Online Workshop hi High School level-a International Online Workshop neih vawi khatna a ni a, zirtirtuten zirlaite-ah an put darh leh tur thu tha tak tak, tangkai tak leh hman nghal tur thil zirho a ni. Mizoram chhunga High School tin atangin Zirtirtu pahnih zel tel tura tih an nih angin an tel tha hle a, Participants hi mi 315 vel zet an ni.