No.2828/2020-2020

Vawiin khan Indian School Psychology Association(InSPA) leh Directorate of School Education tangdun buatsaihin Aizawl District huam chhunga Higher Secondary School Lecturer-te tan ni hnih awh tur zirlai naupangten rilru hrisel tak pu chunga nun an hman theihna tura an puih theih dan turte sawihona ‘Online Workshop on School Psychology Promoting Mental Health and Well-being’ neih a ni a, Pi Esther Lal Ruatkimi IRS, Commissioner & Secretary, School Education Department chu khuallian a ni.

Khuallian Pi Esther Lal Ruatkimi chuan InSPA Mizoramin Online Workshop an buatsaih chu lawmawm a tih thu sawiin state hrang hranga kan harsatna tawhte a inang vek lo va, Covid-19 hripui lêng vanga hun engemaw chen inkharkhip kalpuiah naupangte chu a tuar berte zinga mi an ni a, sikul kal theih loh a nih piah lamah infiamna leh inlenpawhte a rem bawk si loh avangin naupang tam takin harsatna an tawk a, naupangte harsatna tawh hi zirtirtuten kan hriatthiam a tulzia he Workshop atang hian hre thara a taka hmang nghal turin a fuih a ni.

Dr. Panch Ramalingam, President, InSPA chuan thu sawiin he online Workshop hi a taka tangkai taka zirtirtuten hmang ngei tur leh in lam thlenga zirlaite dinhmun hrechianga an harsatna tawhte sutkianpuituah tang ngei turin duhsakna a hlan.

Pu James Lalrinchhana MCS, Director, School Education pawhin thu sawiin kan tunlai boruak nena inmil thupui pawimawh tak hmanga online workshop neih a ni chu lawmawm a tih thu leh mithiam hrang hrangte thupui sawite workshop-a tel Lecturer zawng zawngin an hlawkpui ngei a beisei thu a sawi.

Ramchhung huapa mi thiam bik State pawn atanga tel, resource person/speaker te chu:

1) Dr. Panch Ramalingam, Patron and President, InSPA, Pondicherry,
2) Prof. Shah Alam, Aligarh Muslim University,
3) Prof. S. Thenmozhi, Madras University,
4) Dr. Rita Rani Talukdar, Guwahati University, Assam,
5) Dr. Jagpreet Kaur, Panjabi University, Patiala,
6) Dr. Suja Koshy, Former head & Associate Professor, Mumbai
te an ni.

He online workshop hi HSS level-a Online Workshop neih vawi khatna a ni a, zirtirtuten zirlaiteah an put darh leh tur thu tha tak tak, tangkai tak leh hman nghal tur thil zirho a ni. Aizawl District chhunga HSS tin atangin lecturer pahnih zel tel tura tih an nih angin an tel tha hle a, Participants hi mi 150 chuang an ni.