Thian duhtakte u,

Vawina in zinga kan lo tel thei hi vannei kan inti hle mai.  Kan phu lohvin min lo dawngsawng a, kan lawm tak meuh a ni.  He hun ngai pawimawh a, mahni hna tulte kalsana lo kal zawng zawngte chibai kan buk a che u.

USA-a awm hi kan lo thahnem ve ta hle a. Indianapolis-ah ringawt pawh mi 30,000 chuang kan awm a.  Eizawnna kawng hrang hrangah mi hlawhtling tak tak thahnem tak kan awm a, kan chhuangin kan thlamuanpui em em che u a ni.  USA Citizenship nihna nei leh voting right nei pawh thahnem tak kan awm tawh a.   Tanrualna chang kan hriat phawt chuan Politics-ah pawh ngaih pawimawh tham kan lo ni ve ta a ni.

Khawvelah hian sakhaw hrang hrang kan awm a.  Sakhaw pakhat chhungah pawh pawl hrang tam tak kan awm a.   Sakhua hian khawvelah hian thisen inchhuah tawnna a thlen nasa em em a ni.  USA-ah pawh hian kan unaute zingah Kohhran Pawl hrang a tam hle a.  Ka hriat sual loh chuan Maryland-ah ringawt hian Kohhran 20 vel zet kan awm a ni.  Kohhran hi inpumkhatna aiin inpumkhat lohna thlentu a ni ang tih hi a hlauhawm khawp mai.

Kohhran inpumkhatna – Ecumenical Movement hi kalpui reng a ni a.  India ramah pawh chhim lamah chuan Kohhran hrang hrangten Church of South India an din a.  Chutiang bawk chuan hmar lamah Church of North India a ding bawk a. Church of North East India erawh tun thlengin kan la din ve thei ta lo a ni.

Mizoramah pawh Ecumenical Movement hi kalpui zel a ni a.  Tunah chuan Kohhran hrang 8 ten Council of Churches in Mizoram an lo din thei dawn ta a.  Ni 27 October 2024 hian, Mission Veng Presbyterian Biakin ah a hawnna ropui takin kan nei dawn a ni.

USA a Kohhrante pawh hian mahni pawl thiat kher lovin, kan zavaia min huap zo tur thawhhona huang lo din ve thei ula, a lawmawm ngawt ang.

Kohhran mal Thurin hian Kristiante hi min thehdarh mek a.  A thente phei chu nupui pasala innnei thei lo hial khawpin min daidang a. Kohhran mal thurin ni lovin, Kristain Thurin ah hian lungawi mai thei ila chuan, Biakin te, Office te, Pastor te hi a hranga neih kher a ngai lo vang a, senso a tlem zawk ang a, kan zahawmin kan ropui zawk ngei ang.  Ka ngaihdan chuan, Kohhran leh thlarau lam thila dik ber leh tha bera inngaite hi a dik lo ber an nih zawk ka ring.

Chutiang bawkin USA-ah hian NGO pawl hrang hrang kan tam hle mai.  Kan zavaia min huapzo NGO pakhat nei thei ila, a lawmawm ngawt ang.

Chin Hills-ah hian Revolutionary Group hrang tam fe kan awm leh bawk a. Township pakhat chhungah CDF pahnih pathum te kan awm a. Ethnic group thuhmun ni si thawk ho thei hauh lo te pawh kan awm.  A chang phei chuan unau leh unau, thisen hial te kan inchhuah a.  a pawiin a zahthlak takzet a, i sim ang u.

Manipur lamah pawh pawl hrang an tam hle a.  Tunah chuan impumkhatna lam hawiin ke an pen mek a.  Beiseina sang tak nen kan thlir mek a ni.

Hetiang boruak karah hian, pawl hrang 13 laiin ni 23.06.2023 khan, NUA – Network for Unity Association in din tih kan lo hria a.   Raltlante chhawmdawl hna in thawk nasa hle tih te kan lo hria a.  Chin National day pawh a huhovin vawi-2 in lo hmang tawh a.  Inpumkhatna lamah ke kan pen chho zel dawn niin a lang a, ka lawm tak meuh a ni.  Chin Relief Committee of Mizoram te, Myanmar Relief Committee, Mizoram te pawhin an thawh hlawk hle.  Kan unau raltlante tan, ui lovin in luang chhuak reng tih ka hria a,  kan thla intimuang khawp mai.

India sawrkar pawhin harsatna kan thlen apiang min bawhzuisak zel a. Cash leh kind-in nasa takin min pui tawh a. A bik takin Prime Minister, Home Minister leh Finance Minister chungah kan lawm em em a ni.

Tun hnaiah USA-a kan Kohhran lian pahnih – CBC USA leh CBA NA ten remna palai hna an thawk dawn tih kan lo hria a.  Kan tawngtai chhanna a nih ngei kan beisei takzet a ni.

Mizoram-ah ZORO ten inpumkhatna turin thahnem ngai takin hma an la reng bawk. 

CMI Finland te pawhin palai hna an thawk mek bawk a.  Anni nen hian India Sawrkar hriatpuiin hma lak chhoh zel kan tum a ni.

Ni 28.07.2018 khan, Mya Chapel, Methodist Church, Tahan-ah Chin Unity Forum kan din ho va. Chi peng hrang hrang an lo tel kim hle. Kal khawm pawh kan tam hle a nih kha.  Hnam peng hrang hrangten an hnam puante min present hlawm a, roh takin kan vawng tha reng dawn a ni.  Khami tuma Chin Unity Forum kan din kha a la nung ve reng a, hman ni lawk khan ka Office-ah titi hona kan nei nghe nghe a ni.

Tuna USA-a ka lokal chhan ber pawh hi inpumkhatna kawng zawng turin a ni.  Unau kan ni a, inthen thei kan ni lo tih hi ka chah nawn leh duh che u a ni.  Engtikah emaw chuan, hnama min dintu Pathian chakna hmangin, hnam ropui tak ni turin, rorelna pakhat hnuaiah kan la ding chhuak ang tih i ring tlat ang u.  Ram hian ramri a nei a, hnam erawh chuan ramri a nei lo.  Sawrkar pathum hnuaia diklo taka thehdarha kan awm hi engtik lai mahin kan pawm ngai lo vang. 

Kan inkarah hnam dang tumah tlazep awm lovin, ram thleng inzawmin kan la awm a.  Hei hi Pathian malsawmna ropui tak a ni.   Inpumkhatna thinlung pu theuh turin tih tak meuhin ka ngen che u in, thawhho puiah ka sawm che u a ni.   Pathian hian hmanrua a ngah em em a, “Chakna ni lovin, thiltihtheihna ni hek lovin, ka thlarau zawkin le” tih hi kan innghahna ni fo se.  Kan Pathian hnenah bang lovin i tawngtai zel ang u.

Lalpan malsawm che u rawh se. 

Ka lawm e.