Vawiin khan Department of Personnel & Training, Government of India ruahmanna bawhzuia Administrative Training Institute, Government of Mizoram, Aizawl in Serchhip khawpuia sawrkar hnathawk Groub B (Non-Gazettes) leh Group C te tana Induction Training a kalpui meka Trainee te chuan Serchhip District Hospital (JN Hospital) ah a mamawh te hman atan thisen Unit 8 an pe.

Thisen pekna neih hmaa CMO Conference Hall a inkhawm tawi buatsaihah Serchhip Bawrhsap Dr. Lalrozama, IAS chuan thusawiin, sawrkar hnathawkte chu ram mipuite zirtirtu leh entawn tur te kan nih avangin office atanga mipuite tanpuia mahni hna kan thawh bakah mahni ngei pen chhuakin mi dangte entawn tlak thil tha kan ti fo tur a ni, a ti a. Thisen pek chu nunna chhan nana kan tih theih hlu ber pakhat a nih avangin NGOs, Tlawmngaipawl leh Kohhran Thalai Pawlte tih atana dah mai lovin sawrkar hnathawkte pawh hian tih nachang kan hriat ve thin a tul a ni, a ti a. Serchhip a Department ten anmahni pual emaw sawrkar hnathawk pawl ho pual pawhin Blood Donation hi nei thei thin se a duh thu a tarlang bawk.

Inkhawm tawiah hian Serchhip Blood Bank Officer, Dr. Maria VL Rosangi chuan trainee te hnenah thisen pek a tulna leh a hlauhawm loh dan te sawifiahna hun a hmang a, Medical Supenrintendent Dr. ZD. Lalmuanawma leh Chief Medical Officer Dr. R. Laldawngliana te pawhin thusawina hun an hmang bawk.

Administrative Training Institute (ATI) buatsaih Induction Training hi ni 19.9.2016 Monday khan Serchhip DRDA Conference Hall ah ATI Director Pu S.B Shashank, IAS te, Pi Sailuti, Jt Director (Training) ATI te leh Serchhip Bawrhsap Dr. Lalrozama, IAS te telpuina in neih tan a ni a, ni 12 chhung awh tura ruahman niin Group B leh Group C hnathawktute sawrkar pisa inrelbawl dan leh hnathawh dan hrang hrang a chin chhuakin an zir thar vek dawn a, a remchan dan angin sawrkar Development Programme pawimawh te pawh an zir ho nghal ang.

Zirtirna pe turin ATI Associate Professor Pi Golda Dell Zohmangaihi chuan a awmchilh a, Local Course Co-Ordinator atan Pu Lalfakzuala Chhakchhuak, MCS, SDC Serchhip chu ruat a ni bawk.

Vawiina thisen petute hi mipa  6 leh hmeichhiah 2 an ni.