Mizoram mamawh thlen tura Delhi-a cham mek Industries Minister Pu H.Rohluna chuan Oil India Ltd-a Director Exploration & Development, Pu Sudhakar Mahapatra chu nimin chawhnu dar 3 khan a hmu. Mizoram-a Oil leh Gas zawn hna chak zawka thawk turin Pu Rohluna chuan ngenin hna an thawh chak leh zual nan Drilling Rig pakhat tal dah belh tur leh Oil leh gas zawn hna Keifang bula thawh leh tur chu tan thuai turin a ngen bawk a ni.

Minister-in a ngen ang hian Drilling Rig chu dah belh ngei an tum thu Pu Sudhakar Mahapatra chuan Pu Rohluna chu a hrilh a, chak zawka hna an thawh theih dan en turin  amah ngei Mizoram-a a lo kal tur thu a hrilh bawk.

Oil India Ltd hian Mizoram laihawl vel hi an tuam a, Maubuang bula Oil leh Gas an zawn mek chu metre 4000 chuang an verh tawh a, tunah hian lei chhung lam an endik mek a ni. Maubuanga Lei verh thui zawng tura an tinzawn hi 4500m a ni a, Lei chunglanga lung a chang hle a, an verh chak theih loh phah a, darkar khata 1.21m a chakin khawlin an verh mek a, chhun zan zawmin verh hna hi an thawk a ni. Hnathawktu nitin 150 vel an awm reng a, heng zingah hian tualchhung mi 20 chuang an awm  bawk. Maubuanga Oil zawn hna an thawhnaah hian ni khata company-in an senso chu chawhrualin cheng nuai 14 vel a ni a. Oil laihchhuah hi a process a rei avangin laihchhuah anih atanga kum 7 hnuah a hman theih chauh dawn a ni.