Vawiin khan Industries Minister Pu S. Hiato chuan Sairang-a Mizoram Venus Bamboo Products Pvt. Ltd. leh Zonun Mat Ply (P) Ltd., Lengpui te a hmunah tlawhin an khawl neih leh an hnathawh dante chipchiar takin a enpui. Minister rual hian Industries Director Pu Shurbir Singh leh Jt. Director Pu G. Malsawmdawngliana bakah Bamboo Development Agency (BDA) hotu engemawzat an kal a ni.

 

 

Mizoram Venus Bamboo Products Pvt. Ltd. a tlawhnaah Minister chuan hemi atan hian Mizoram sorkarin sum tam tak a sen tawh thu sawiin mau leh thing sawngbawlna hmun tha tak, mi tam tak te tana eizawnna siam sak thei industry a nih avangin sorkar pawhin theihtawp chhuah lehin a tak taka hna tan theihna turin hmalak a tum ang a ti a. Sum siam tur ringawta a dera industry din thin ten a ti tak tak te a ti beidawng thin naa, theihtawp kan chhuah chuan Venus Bamboo pawh hian rah duhawm tak a la chhuah theih a ni tih a beisei thu a sawichhuak bawk. Mizoram Venus Bamboo Pvt. Ltd. chungchang zirchiang turin Inquiry Commission din a nih thu leh a tha lo lai lai siamthata hna tan thuai chu kan tum ber tur a ni tiin Minister chuan Industries hotute a chah a ni.

Industries Director Pu Shurbir Singh chuan Mizoram Venus Bamboo Products Pvt. Ltd. chungchang hrilhfiahin tunah hian a fuh loh lai te, ba neih zat te chhui mek a nih thu leh he industry chawhnun leh nana thil mamawhte zirchian mek a ni, a ti a. Hriat theih chinah BDA kaltlangin Mizoram sorkar chuan hemi atan hian cheng vaibelchhe 11 a seng tawh a, Mizoram sorkarin thawhhona thuthlung a ziahpui Venus Group te chuan cheng nuai 63 an thawh bawk a ni tih Director chuan a sawi a. Vanduaithlak takin original documents pawimawh tak tak te chu Venus Bamboo Pvt. Ltd. Managing Director ni thin K K Shah kutah a la awm vek avanga zirchian a nih theih loh thu leh an hriat chinah he hmun atang hian engmah siamchhuah/hralhchhuah a la nih loh thu leh loan pek chhuahte pawh engmah rulh a la nih loh thu Pu Shurbir Singh chuan a sawi.

Vawiin vek khan Industries Minister chuan Lengpui-a Zonun Mat Ply (P) Ltd. a tlawh a, he industry neitu Pu Zonunthara leh hnathawkten lo hmuakin Minister hi a hmun an fanpui a ni. Zonun Mat Ply (P) Ltd. chu kum 1990 atang khan din tan tawh a ni a, kum 2004 atang khan mau matply an siamchhuak tan a. Kum khat chhungin mau matply 21,000 metric tonne an siamchhuah theih thu Pu Zonunthara chuan a sawi a, India chhim lam tsunami avanga chhiatna rapthlak a thlen tum pawh khan Zonun Matply atanga siam chhuah dap deuh hlir an hman thu a sawilang bawk.