Industries Minister Pu S Hiato leh Parliamentary Secretary Pu H Zothangliana te chuan zankhat riak in Inrinni September ni 10 khan Hailkhandi District a Cachar Paper Mill an tlawh a. Indutries Department Director Pu Zothankhuma IAS, Pi Lalrodingi, Jt. Director Industries Department, Bamboo Development Agency leh I&PR aiawh ten an tawiawm a ni.

An thlen zan September ni 9 khan Cachar Paper Mill Employees Recreation and Welfare Club chuan an Community Centre-ah an lo lawm a; an pualin cultural programme an buatsaih bawk. Hemi zan hian Chief Engineer Cachar Paper Mill chuan Minister hi zanraih a buatsaih sak bawk a ni. A tuk zing dar 8 khan Cachar Paper Mill Workers’ Union hruaitute chuan tunhnai a Mizoram atanga mau supply a khaihlak vanga Mill in harsatna a tawh chungchang chipchhair takin Minister leh Parliamentary Secretary te an sawipui hnu in, a ziakin memorandum an thehlut nghal bawk a ni.

Union hruaitute nena an inkawmhona ah hian Pu Hiato chuan Mizoram leh Cachar Paper Mill chu in mamawh tawn an nih thu sawiin harsatna awm te chu tharum leh invauna tel maih lovin dawhkan kil hova lungrual taka sawiho anih chuan rah tha a chhuah thin thu a sawi. Mizoram leh Cachar District chu thenawm kan ni tiin road block leh bandh huaihawt thin hian Cachar leh Mizoram mipui te tan harsatna a siam thin thu a sawi. Minister hian Cachar Paper Mill hnathawktute leh Cachar District mipui te chu heng hi ti lova, inunauna boruak tha nei a, harsatna siam lo turin a chah bawk a ni.

Minister chuan Bamboo Mahal lo kalpui thin dan khan Mizoram-ah ramngaw a bikin khawtlang lam pangah nasa taka ram a tih chereu avangin tih tawp a nih thu a sawi a.Minister hian awmze nei zawk leh ramngaw humhalh chunga scientific takin mau lak (harvest) a pawimawh thu a sawi a. Hemi atan hian Sorkar in ruahmanna tha leh tlo duan a tum thu hrilhin, Bangladesh company te pawhin Mizoram mau chu an ngaihven reng thu a hrilh bawk a ni. Union hruaitute chuan Mizoram atanga mau supply a awm loh chuan Mill dinhmun chu a derthawng dawn tiin khar ngai dinhmun a ah din theih thu an sawi.

Parliamentary Secretary chuan Mizoram chhim lamah mau a tam thu sawi a, a phurh thlakna man erawh a to dawn an ni tiin, mau sawngbawlna Pulping Unit Mizoram-ah din anih theih chuan Paper Mill harsatna chu a kiam theih thu a sawi. Hei hian Paper Mill dinhmun derthawng a siam that theih bakah Mizoram mau hausakna chu awmze nei zawka hman a nih theih thu a sawi. Union hruaitute chuan Chief Minister Pu Lal Thanhawla pawh Mill tlawh tura sawm an duh thu Minister hi an hrilh a ni.Hemi hnu hian Paper Mill hotute chuan an Chief Engineer hovin Minister leh a tawiawm tute chu Paper Mill Plant darkar khat leh a chanve chuang an fanpui a. Unit hrang hrang ah kalkual puiin lehkha siam dan kalhmang chipchhair takin an hrilh bawk a ni. Hemi hnu hian Technical Room ah an thukhawm a; hetah hian Cachar Paper Mill chanchin presentation hmangin an hrilhfiah bawk.

Inkawm hona ah hian Minister chuan a hmuna thil awmzia hrechiang tur leh Mizoram leh CPM inkara thawhhona kawng tha zawk a awm theih nan Mill dinhmun zirchiang turin amah leh a tawiawm tute an rawn kal thu CPM hotute chu a hrilh a. Mizoram Sorkar chuan mau pawimawh zia hria in awmze nei leh hlawk zawka mau chungchang buaipui turin Bamboo Development Agency din anih thu sawi a. Minister chuan mau lak leh mau a sumdawna atan ruahmanna felfai tak, Sorkar pawhin a hlawkpui theih leh Mizo mipui ten tun aia an chhawr tangkai theih zawk nan ruahmanna Sorkar chuan a ngaihtuah tur thu a sawi bawk. CPC hotute pawhin mau hmanga sumdawnna chu Mizoram leh Mizo mipui leh Cachar Paper Mill inkara midang inrawlh lova kalpui tha an tih thu an sawi a. Mahse Mizo mipui ten mau a sumdawnna chinchang an hriat theih nan midang nen hun rei vak lo chu thawh ho tha an tih thu an sawi.

Presentation ah  hian Mautam avang khan Paper Mill-in lehkha an siam tlem dan an tarlang a; Mill in a siam theih chin aia tlem zel an siam chhuah thu leh 2005 atang 2011 theng Mill sumpai dinhmun an tarlang bawk a; kum hnih kalta khan Company chuan sum vaibelchhe 200 vel a hloh thu an sawi tel bawk a ni. Cachar Paper Mill ah Chief Engineer chuan Mill hnathawktute leh a bul hnaia khua te chuan Minister in a tlawh chu Paper Mill kal zelna turah rah tha a chauh an beisei thu leh Minister leh Mizoram Sorkar chungah beiseina sang tak an neih thu a sawi bawk.

Hindustan Paper Corporation Limited hi Sorkar Laipui in 1970 vel khan Ministry of Heavy Industries hnuaia a din a ni a. Company hian Hmarchhak ah Panchgram leh Nowgong ah te Paper Mill a neih bakah Kottayam ah chanchinbu atan lehkha siamna bik (newsprint) Hindustan Newsprint Ltd. leh Mokokchung District a Nagaland Pulp & Paper Company Ltd. te a enkawl tel bawk a ni. Cachar Paper Mill hian kum khat ah lehkha metric ton nuai khat vel an siam chhuak thei a. Hnathawktu a nghet 1200 vel leh a nghet loh in mi 2000 vel an awm mek a ni.