Ni 5 chhung awh tur INFLIBNET Regional Training Progrmme on Library Automation chu a vawi 2-na atan vawiin khan Govt. Hrangbana College Tawngtaina In-ah Mizoram University Vice Chancellor Prof. R.Lalthantluanga’n a hawng. He training hi Govt. Hrangbana College leh INFLIBNET Centre, Ahmedabad te tangkawp buatsaih a ni a. Hawnna inkhawm hi Pu K.Liantuala, Principal, Govt. Hrangbana College chuan kaihruaiin Pu Lalchatuana, Coordinator chuan report a pe a, Prof. Pravakar Rath, Head Department of Library and Information Science chuan Keynote address a pe a. Pu Hosamani Scientist C, INFLIBNET Centre, Ahmedabad chuan thu a sawi bawk.

Khuallian Prof R.Lalthantluanga chuan hriatna, thiamna lo pung zelah Library in hma a sawn zel a tul tiin Principal leh thuneitu ten Library dah pawimawh a tul thu a sawi a. Keynote Speaker, Prof. Pravakar Rath, Head, Department of Library & Information Science pawhin thu sawiin Mizoram a College Library te than dan a inrual lo lutuk chu a ngaihmawh thu te, heti chunga Hrangbana College Library Committee leh INFLIBNET Centre ten Training Programme an buatsaih chu lawmawm a tih thu sawiin hma latu Principal, Govt. Hrangbana College leh Librarian te chungah lawmthu a sawi a ni.

Hetiang training ni Dec. 6 – 10 2010 khan Govt. Hrangbana College Library Committee leh INFLIBNET tangkawp huaihawt hian neih a lo ni tawh a. Mizorama College 24 zingah College 12 chuan SOUL (Software for University Library) hmangin Library Automation hna an tan tawh a. Tun tumah hian College 5 leh Aizawl Civil Hospital Library te chuan Library Automation hmalak tan tumin SOUL Software an lei thar dawn a ni.

College Library Automation atana SOUL Software hmang mek te chu hengte hi an ni: 1) Govt. Hrangbana College, Aizawl ; 2) Govt. Aizawl College, Aizawl ; 3) Pachhunga Univeristy College, Aizawl, ( unlimited version); 4) Govt. Serchhip College Serchhip ; 5) Govt. Aizawl West College, Aizawl ; 6) Govt. T.Romana College, Aizawl;  7)Govt. J.Thankima College, Aizawl ; 8) Govt. Hnahthial College, Hnahthial ; 9)Govt. Saitual College, Saitual ;10) College of Teachers Education ; 11)Govt. Aizawl North College, Aizawl ; 12)Higher and Technical Education Mizoram,( HATIM) Lunglei.

Attachment

  • Loading attachment...