434/2022-2023
Aizawl 9th May 2022: Vawiin khan Human Resource Development Board Vice Chairman Pu L.Thangmawia chuan National Institute of Electronics and Information Technology (NIELIT), Samagra Shiksha - Mizoram leh Mizoram IT Society te tang tlangin an buatsaih kar khat awh tur 'Capacity Building of School Teachers on IECT Technologies' chu New Academic Building, NIELIT Aizawl, Zuangtui-ah a hawng.

He kar khat awh tur Capacity Building Training 1st Batch hawnnaah thusawiin Pu L.Thangmawia chuan khawvel ram hrang hrangte insingsak dan enin, ICT hi zirnaah hman tam telh telh a ni dawn a, ICT tangkai zawka Mizoram zirnaa hman a nih theih nan zirtirtu leh office lama thawktute tan intuaihriam leh tanlak a ngai tawh hle a ni a ti. Zirna lama technology hmang tangkai tura hmalakna hi Mizoramah thil thar ni lovin, hun rei tak kal ta atang khan SCERT-in a lo kalpui tawh a ni a ti a. Mizoram bikah zirna lama ICT hmang tangkai tura ke pen duh anga a chak tawk theih loh laiin kum 2020 kum tira Covid hripui lo leng chuan loh theih loha ICT hman ngei ngei ngaiin min siam a. He hripui hi rapthlak hle mahse kawng leh lamah chuan ICT hman kawngah bung thar min kai tir thung a ni a ti. Covid hripui reh hnuah pawh tangkai zawka hmang tura kan inpuahchah a tul hle a, ICT tangkai taka hman theih a nih chuan zirlaite tan a tangkai hle dawn a, Mizoram zirnain hmel thar a hmu dawn a ni a ti bawk. School Education Minister Pu Lalchhandama Ralte hmalaknain Covid-19 hripui leng karah zirna bahlah lova a kal theih nan ‘State Level Online Education Committee’ din a ni a, he Committee hian IT thiamte phungbawmah sawmin covid hripui len laia zirna kalpui dan tur 'Guidelines for Education during prevalence of covid-19 pandemic' chu a duang chhuak a, Central sawrkar beng pawh a verh hle a, zirtirtute taihmakna leh inpekna a zarah heng ruahmanna kaltlang hian hripui len chhung zawng pawh khan zirna hi a theih anga kalpui reng a ni a ti.

Thu a sawi zelnaah Vice-Chairman HRD Board Pu L. Thangmawia chuan Human Resources Development Board pawhin Mizoram IT Society te nen thawhhona thuthlung mumal taka siamin hripui len lai hian sikul zirtirtute tan biakhmuhtheihna hmangin ICT training vawi 4 lai a buatsaih a, University mithiamte hnenah Research Project grant a pe chhuak bawk tih a tarlang a. Heng atana senso tulte hi SEDP atangin phuhruk zel a ni a, a chungah pawh HRD Board chuan lawmthu a sawi a ni tiin Mizoram IT Society te nena thawhhona thuthlung hi Samagra Shiksha, Mizoram chuan hmang tangkai nghalin ‘ICT Enabled School Management’ tih chu 6-10, December, 2021 khan Mizoram IT Society te nen Mizoram chhunga school hrang hrang ten ICT tangkai zawka an hman theih nan training hlawhtling takin an nei a, hun harsa kara kan IT mithiam neihte zirna hmasawn nana an penchhuak thin hi lawmawm a tih thu a sawi. HRD Board chuan ICT hmanrua mamawh phuhruk nan Mizoram school hrang hranga hman turin smart class unit 1000 leh virtual class unit 2000 bunna atan Rs 154 Crore chu sawrkar laipuiah, Mizoram State Planning Board kaltlangin a dil mek a, beiseina nen kan nghak mek a ni a ti bawk.

India ramah Educational Technology hian ngaih pawimawh a hlawh chho ta zel a, Center for Educational Technology (CET) leh Department of Teaching Aids (DTA) te thiat a, zawmkhawmin Central Institute of Educational Technology (CIET) chu kum 1984 khan National Council of Educational Research and Training (NCERT) hnuaia peng pawimawh tak pakhat ni turin din a lo ni hial tawh a. He mi bawhzui hian Mizoramah pawh State Council of Educational Research and Training (SCERT) chuan kum 1984 khan Educational Technology (ET) Cell din ve nghalin NCERT dungzui hian Mizoram chhungah nasa takin hma an la chho a. Tunah phei chuan ET leh Computer Literacy & Studies in Schools (CLASS) Project te kaikawpin ni 9.3.2004 khan ‘Information & Communication Technology (ICT) in Schools Scheme’ chu SCERT chuan a kalpui ta a ni. He scheme hnuaiah hian sikul 276 lai te hnenah Computer leh accessories set 10 theuh pek an lo ni tawh a, zirtirtute tan training pawh vawi tam tak buatsaih a ni tawh nghe nghe a, SCERT hian kum 2017 atang khan satellite kaltlanga zirtirna EDUSAT a kalpui mek bawk a ni.

Vawiina training hawn tak hi zirtirtu 600 te tana buatsaih a ni dawn a. Hei hi Batch (Thawh) 6-a kalpui tur niin batch tinah hian zirtirtu 100 zel tan karkhat awh training neih zel a ni ang a. Batch hmasa ber hi 9-13, May, 2022 a neih a ni ang a, batch tawp ber tur, a thawh rukna hi 18-22, July, 2022 a neih tura ruahman a ni.

Training hawnna hunah hian Pu Zionparlawma, Dy. State Project Director, Samagra Shiksha-Mizoram leh Dr C.Lalnuntluanga, President, Mizoram IT Society te pawhin thusawiin Pu T.Gunendra Singh, Director, NIELIT Aizawl in inlawmna thu a sawi a. Pu C.Zoremsanga, Scientist-D, NIELIT in report pein Pu Vanlalnunga, Joint Director, NIELIT in lawmthu sawiin hun a khar a ni.